काठमाडौं (हाम्रो खेलकुद) – स्पिनर सागर ढकाल र दीपेन्द्रसिंह ऐरीको घातक बलिङसँगै चौथो संस्करणको प्रधानमन्त्री कप राष्ट्रिय क्रिकेट प्रतियोगितामा सुदूरपश्चिमले पुलिसलाई १ सय ११ रनको सामान्य लक्ष्य दिएको छ ।

टियु क्रिकेट मैदानमा टस हारेर पहिला ब्याटिङ थालेको सुदूरपश्चिम ओभरमा ३३.१ रनमा १ सय १० रनमा अल आउट भयो । राम्रो सुरुवात गरेपनि मध्यक्रम र तल्लोक्रमका ब्याट्सम्यान चल्न नसक्दा सुदूरपश्चिम सस्तैमा समेटिएको हो । एक समय १६.३ ओभरमा ८०–१ रनको अवस्थामा रहेको सुदूरपश्चिमको नाटकीय विकेटपतनसँगै १ सय १० रनमै अल आउट भएको हो । समग्रमा सुदूरपश्चिमले ३० रन जोड्न ९ विकेट गुमाउन पुग्यो ।

पहिलो ओभरको दोस्रो बलमै ओपनर तथा कप्तान सन्तोष भट्ट शून्यमा रन आउट हुन पुगेका थिए । त्यसपछि दोस्रो विकेटका लागि खडक बहादुर बोहरा र सन्जु दमाईले ८० रनको साझेदारी गर्दै सुदूरपश्चिमलाई उत्कृष्ट सुरुवात दिलाएका थिए । तर १७ औं ओभरको चौथो बलमा स्पिनर सागर ढकालले खडकलाई ४० रनमा एलबिडब्लू आउट गरेपछि सुदूरपश्चिमको नाटकीय विकेटपतन सुरु भएको थियो । खडकले ५३ बलमा ८ चौका प्रहार गरे ।

सागरको २१ औं ओभरको दोस्रो बलमा ठूलो सट खेलेका सन्जु लङअनमा सुनिल धमलाबाट ३५ रनमा क्याच आउट हुन पुगेका थिए । सन्जुले ५८ बलमा ५ चौका प्रहार गरे । २७ औं ओभरको तेस्रो बलमा अरुण ऐरी १३ रनमा स्टम्पिङ आउट भए । त्यसपछिका ब्याट्सम्यानले भने दोहोरो अंकमा रन बनाउन सकेनन् ।

२८ औं ओभरको दोस्रो बलमा नारायण जोशी एक रनमा आउट भएपछि सुदूरपश्चिमको ठूलो सम्भावना सकिएको थियो । किरण ठगुन्ना, नरेन्द्र साउद, हेमन्त धामी र शेर मल्लले खाता खोल्न सकेनन् । अर्जुन साउद ३४ बलमा १ चौका सहित १० रनमा आउट भए ।

स्पिनर सागर ढकालले १० ओभरमा ३ मेडन सहित १८ रन खर्चेर ४ विकेट लिए । दिपेन्द्रसिंह ऐरीले ६.१ ओभरमा २ मेडन सहित १० रन खर्चेर ४ विकेट लिए ।