काठमाडौं (हाम्रो खेलकुद) – प्रधानमन्त्री कप राष्ट्रिय क्रिकेट प्रतियोगिताको समाचार संकलनका क्रममा आयोजक टोलीका एक जिम्मेवार सदस्यबाट समाचार संकलनमा रहेका खेलकुद पत्रकारमाथि भएको अभद्र व्यवहारप्रति नेपाल खेलकुद पत्रकार मञ्चले आफ्नो गम्भिर ध्यानाकर्षण भएको जनाएको छ ।

नेपाल क्रिकेट संघ (क्यान) को आयोजनामा मुलपानी र टियूमा प्रतियोगिता सञ्चालन भइरहेको छ । मंगलबार मूलपानी क्रिकेट मैदानमा कर्णाली र गण्डकी प्रदेशबीचको खेलपछि नियमित पोष्ट म्याच प्रेस कन्फ्रेन्स भएको थियो ।

त्यसमा खेल पत्रकारले कर्णालीका प्रशिक्षकसंग अन्तर्वार्ता लिइरहेका बेला बागमती प्रदेश क्रिकेट संघका सदस्य अजय वीर पाण्डेले कति चाहिने नचाहिने प्रश्न गरिरहेको ? भन्दै आक्रामक रुपमा प्रस्तुत भएर पत्रकार सम्मेलनमा हस्तक्षेप गरेका थिए ।

मिडिया जोनु मा अन्तर्वार्ता चलिरहेको बेला उनले गरेको सो अभद्र व्यवहारको खेलपत्रकारहरुले विरोध गरेका थिए । पाण्डे त्यतिमा न रोकिएनन् , मञ्चका महासचिव प्रज्वल ओलीले मंगलबार जारी विज्ञप्तीमा भनिएको छ ।

पत्रकार सम्मेलन अवरुद्ध भएपछि त्यहाँबाट हिँडेका पत्रकारहरुलाई उनले फेरी अभद्र व्यवहार गरेको बताइएको छ । पत्रकारहरुले प्रतिकार गर्न खोज्दा धम्किको भाषा प्रयोग गरे। मञ्चले पाण्डे त्यो अभद्र व्यवहारको घोर भत्सर्ना गरेको छ । साथै पाण्डेमाथि कडा भन्दा कडा कारवाहीको माग समेत गरेको छ ।

पाण्डे पिएम कपको एन्टि करप्सन युनिट (एसीयु) कमिटीका सदस्य पनि हुन् । क्यानका अध्यक्ष चतुरबहादुर चन्द र सचिव अशोकनाथ प्याकुरेलसँग छलफल हुंदा उनीहरुले पाण्डेको हरकतबारे ध्यानाकर्षण भएको तथा छानविन गरी दोषी भेटिए कारवाही गर्ने वचनवद्धता प्रकट गरेको मञ्चले विज्ञप्तीमा उल्लेख गरेको छ । मञ्चले खेल पत्रकारहरुलाई सुरक्षित रुपमा सुचना संकलन गर्ने वातावरण बनाउन क्यानसँग माग समेत गरेको छ ।