काठमाडौं (हाम्रो खेलकुद) – प्रधानमन्त्री कप राष्ट्रिय एकदिवसिय क्रिकेट प्रतियोगितामा गण्डकीले प्रदेश एकमाथि २ विकेटको रोमान्चक जित हात पारेको छ ।

जितका लागि १ सय ३ रनको विजयी लक्ष्य पछ्याएको गण्डकीले ३७ ओभरमा ८ विकेट गुमाउँदै पूरा गर्यो । गण्डकीको जितमा दुई युवा ब्याट्सम्यान अर्जुन कुमाल र दीपक डुम्रेले ३५–३५ रनको योगदान दिए । २३ औं ओभरमा रन आउट हुनुअघि अर्जुनले ६८ बलमा ५ चौका प्रहार गरे ।

अर्जुन आउट भएको एक बलपछि शुवन्कर उराउले एलबिडब्लू आउट गर्नुअघि दीपकले ९४ बलमा ४ चौका प्रहार गरे । खराब सुरुवात गरेको गण्डकीलाई तेस्रो विकेटका लागि अर्जुन र दीपकले ५५ रनको महत्वपूर्ण साझेदारी गर्दै जितको आधार तय गरेका थिए । तर तल्लोक्रमका ब्याट्सम्यान लगायतार आउट हुँदा गण्डकीले संघर्ष गर्नुपरेको थियो ।

अविषेक थापा ४० बलमा २ चौका सहित १३ रनमा अविजित रहे । राहुल उपाध्याय शून्य, समिर कंडेल १, दीपेश खत्री शून्य, पिविन खत्री ८ र दीनेश बुढामगर ७ रनमा आउट भए । प्रदेश एकका शुवन्कर उराउ र मिनाश थापाले २–२ विकेट लिए । दीपेश कंडेल र हेमन्त राईले १–१ विकेट लिए ।

त्यसअघि मुलपानी क्रिकेट मैदानमा टस जितेर पहिला ब्याटिङ रोजेको प्रदेश एक २७.४ ओभरमा १ सय २ रनमा अल आउट भएको थियो । प्रदेश एकका ओपनर मिनास थापाले २२, सिद्धान्त लोहनी २४, दीपक पासवान ११, शुवन्कर उराउ १२ र दीपेश कंडेल १० रनमा आउट भए । अन्यले राम्रो प्रर्दशन गर्न सकेनन् ।

स्पिनर विशालले २८ औं ओभरको दोस्रो बलमा राजन मगरलाई राहुल उपाध्यायबाट ४ रनमा क्याच गराए । तेस्रो बलमा मनोज तामाङ र चौथो बलमा हेमन्त राईलाई शून्यमा एलबिडब्लू आउट गर्दै ह्याट्रिक पूरा गरेका थिए । कप्तान विपिन खत्री र सुबास भण्डारीले शीर्ष र मध्यक्रम धरासय बनाएका थिए । प्रदेश एकका सबै विकेट स्पिनरले लिएका हुन् ।

युवा स्पिनर विशाल पौडेलले ६.४ ओभरमा २५ रन खर्चेर ४ विकेट लिए । अर्का युवा स्पिनर सुबास भण्डारीले ७ ओभरमा ४ मेडन सहित १८ रन खर्चेर ४ विकेट लिए । कप्तान विपिन खत्रीले १० ओभरमा २ मेडन सहित ३४ रन खर्चेर २ विकेट लिए ।

गण्डकी पहिलो खेलमा आर्मीसँग ९८ रनले पराजित भएको थियो । तेस्रो खेलमा गण्डकीले मंगलबार कर्णालीसँग मुलपानीमै खेल्ने छ । प्रदेश एक पहिलो खेलमा एपिएफसँग १ सय ३५ रनले पराजित भएको थियो । तेस्रो खेलमा प्रदेश एकले आर्मीसँग बुधबार मुलपानीमा खेल्ने छ ।