काठमाडौं (हाम्रो खेलकुद) – ओपनर अनिल मण्डलको अर्धशतकको सहयोगमा आर्मीले प्रधानमन्त्री कप राष्ट्रिय क्रिकेट प्रतियोगिता चौथो खेलमा कर्णाली प्रदेशलाई १ सय ९६ रनको मध्यम लक्ष्य दिएको छ ।

मुलपानी क्रिकेट मैदानमा टस जितेर पहिला ब्याटिङ थालेको आर्मी ४३.१ ओभरमा १ सय ९५ रनमा अल आउट भयो । आर्मीका ओपनर अनिल मण्डलले १ सय १४ बलमा १४ चौका सहित सर्वाधिक ८९ रनको योगदान दिए । कप्तान विनोद भण्डारीले ५५ बलमा ३ चौका र १ छक्का सहित ४१ रनको योगदान दिए ।

तेस्रो ओभरको तेस्रो बलमा दीनेश अधिकारीले विकेटकिपर राजु रिजाललाई हेमन्त ओलीबाट शून्यमा क्याच गराउँदै पहिलो सफलता दिलाएका थिए । अनुज चुनराले युवा ब्याट्सम्यान रोहित कुमार पौडेललाई नवौं ओभरको तेस्रो बलमा विपिन रावलबाट ११ रनमा क्याच गराउँदै दोस्रो सफलता दिलाए । रोहितले १८ बलमा १ चौका प्रहार गरे । १३ औं ओभरको पहिलो बलमा हरि चौहानलाई राज शाहले ७ रनमा क्याच गराउएपछि आर्मी ४२–३ को अवस्थामा पुगेको थियो ।

खराब सुरुवात गरेको आर्मीलाई अनिल र विनोदले चौथो विकेटका लागि १ सय १५ रनको शतकीय साझेदारी गर्दै इनिङलाई उकासेका थिए । तर ३४ औं ओभरको पहिलो बलमा दिवान पुनले विनोदलाई एलबिडब्लू आउट गरेसँगै कर्णाली खेलमा फर्किको थियो । लोकेश ६ बलमा २ छक्का प्रहार गर्दै १३ रनमा क्याच आउट भए । भिम सार्की र साहब आमलले खाता खोल्न सकेनन् । राजेश पुलामी १६ र सुशन भारी ४ रनको योगदान दिए ।

कर्णालीका दिवान पुन, राज शाह र दिनेश अधिकारीले २–२ विकेट लिए । रविन्द्रजंग शाही, अनुज चुनरा र युनिस सिंहले १–१ विकेट लिए ।