काठमाडौं (हाम्रो खेलकुद) – चौथो संस्करणको प्रधानमन्त्री कप राष्ट्रिय क्रिकेट प्रतियोगिता तेस्रो खेलमा बागमती प्रदेशविरुद्ध साविक विजेता पुलिस संकटमा परेको छ ।

टियु क्रिकेट मैदानमा टस हारेर ब्याटिङ थालेको पुलिसले २४ ओभरमा ६ विकेट गुमाउँदै १ सय ६ रन बनाएको छ । पुलिसका पवन सरार्फ र मन्जित श्रेष्ठ क्रिजमा छन् । पहिलो ओभरको तेस्रो बलमै सुनिल धमलाले एक रनमा जीवनदान पाएका थिए । तीव्र गतिका बलर रामनरेश गिरीको बलमा एज लागेर गएको बल विकेटकिपर आकाश थापाले छोड्न पुगेका थिए ।

रामनरेशको सातौं ओभरमा तेस्रो बलमा ठूलो सट खेल्ने धुनमा धमला मिस हुँदा १७ रनमा एलबिडब्लूको शिकार बन्न पुगे । धमलाले २२ बलमा ३ चौका प्रहार गरे । नवौं ओभरको तेस्रो बलमा रामनरेशले अमितलाई मिड अफमा ज्ञानेन्द्र मल्लबाट क्याच आउट गराएका थिए । अमितले १० बलमा १ छक्का प्रहार गरे ।

तीव्र गतिका बलर नन्दन यादवले १५ औं ओभरको तेस्रो बलमा ओपनर कुशल भुर्तेललाई फस्ट स्लिपमा रहेका पारस खड्काबाट १७ रनमा क्याच गराएपछि पुलिस दबाबमा परेको थियो । ३९ बल खेलेका उनले २ चौका प्रहार गरे ।

१४.३ ओभरमा ६६–३ को अवस्थामा रहेको पुलिसलाई आरिफ शेख र दीपेन्द्र सिंह ऐरीले ३४ रनको साझेदारी गर्दै सम्हाल्न खोजेका थिए । तर युवा लेगस्पिनर तिलकराज भण्डारीले आरिफलाई २१ रनमा एलबिडब्लू आउट गर्दै पेभिलिएन फर्काएपछि बागमतीले उत्कृष्ट सुरुवात गरेको थियो । आरिफले २५ बलमा ३ चौका प्रहार गरे ।

२३ औं ओभरमा नन्दनले दीपेन्द्रलाई २१ रनमा आकाशबाट २१ रनमा क्याच आउट गराएपछि पुलिस १०२– ५ को कमजोर अवस्थामा पुगेको थियो । दीपेन्द्रले ३९ बलमा २ चौका प्रहार गरे । लगत्तैं तिलकको २४ औं ओभरको दोस्रो बलमा अनिल कुमार शाह एज लागेर फस्ट स्लिपमा रहेका पारसबाट १ रनमा क्याच भएपछि पुलिस संकटमा परेको छ ।