एजेन्सी – युवा ब्याट्सम्यान मार्नस लाबुसेनले भारतसँगको चौथो तथा अन्तिम टेष्ट खेलमा पहिलो इनिङमा शतक प्रहार गरेका छन् ।

लाबुसेनले १ सय ९५ बलमा ९ चौका सहयोगमा आफ्नो टेष्ट करिअरको पाँचौ शतक प्रहार गर्दै टोलीलाई बलियो योगफलतर्फ अघि बढाएका छन् । ६३ औैं ओभरको अन्तिम बलमा मोहम्मद सिराजको बलमा ४ रन जोड्दै लाबुसेनले शतक पूरा गरेका थिए ।

द गाब्बा ब्रिस्बेनमा टस जितेर पहिला ब्याटिङ थालेको अष्ट्रेलियाले पहिलो दिनको तेस्रो सेसन जारी रहँदा ४ विकेट गुमाउँदै २ सय रन बनाएको छ । मार्नस लाबुसेन १ सय १ रनमा खेल्दा उनलाई साथ क्यामरन ग्रिनले दिएका छन् ।

पहिलो ओभरको अन्तिम बलमा ओपनर डेभिड वार्नरलाई मोहम्मद सिराजले रोहित शर्माबाट एक रनमा क्याच गराएका थिए । सार्दुल ठाकुरले नवौैं ओभरको पहिलो बलमा अर्का ओपनर मार्कस हरिसलाई वासिन्टन सुन्दरबाट ५ रनमा क्याच गराउँदै भारतलाई उत्कृष्ट सुरुवात दिलाए ।

तेस्रो विकेटका लागि स्टिभ स्मिथ र मार्नस लाबुसेनले ७० रनको साझेदारी गर्दै इनिङलाई अगाडि बढाएका थिए । ३५ औं ओभरको पहिलो पहिलो बलमा वासिन्टनले स्मिथलाई रोहितबाट क्याच गराउँदै महत्वपूर्ण सफलता दिलाएका थिए । डेब्यू खेल खेलेका सुन्दरको टेष्ट करिअरको पहिलो विकेट हो । स्मिथले ७७ बलमा ५ चौका सहित ३६ रन जोडे ।

चौथो विकेटका लागि लाबुसेन र म्याथ्यु वेडले १ सय १३ रनको शतकीय साझेदारी गर्दै अष्ट्रेलियालाई बलियो योगफलतर्फ अघि बढाएका थिए । तीव्र गतिका बलर टि नटराजनले ६४ औं ओभरमा वेडलाई ४५ रनमा क्याच गराउँदै डेब्यू खेलमा आफ्नो पहिलो विकेट लिएका छन् । वेडले ८७ बलमा ६ चौका प्रहार गरे ।