काठमाडौं (हाम्रो खेलकुद) – प्रधानमन्त्री राष्ट्रिय एकदिवसिय क्रिकेट प्रतियोगिता अन्तर्गत लुम्बिनी प्रदेश छनोटमा रुपन्देहीले लगातार दोस्रो जित हात पारेको छ ।

रुपन्देहीले शनिबार दोस्रो खेलमा कपिलवस्तुलाई ६९ रनले पराजित गरेको छ । सिद्धार्थ रंगशालामा टस हारेर पहिला ब्याटिङ थालेको रुपन्देहीले निर्धारित ३८ ओभरमा ८ विकेट गुमाउँदै १ सय ६७ रन बनाएको थियो ।

रुपन्देहीका देभ खनालले ३३, सन्दीप सुनारले २७, सन्दीप रजालीले ३९, कृष्ण कार्की १६ र विक्रम भुषालले १७ रनको योगदान दिए । कपिलवस्तुका दुर्गेश कुर्मीले ८ ओभरमा २८ रन खर्चेर ४ विकेट लिए ।

जितका लागि १ सय ६८ रनको विजयी लक्ष्य पछ्याएको कपिलवस्तु २७.३ ओभरमा ९८ रनमा अल आउट भएको थियो । कपिलवस्तुका रमेश पाठक २०, सुमन थापाले १३ र राज अग्रहारीले १४ रनको योगदान दिन बाहेक अन्यले दोहोरो अंकमा रन बनाउन सकेनन् । अनिल खरेल र विक्रम भुषालले ३–३ विकेट लिए । कप्तान कृष्ण कार्की, दुर्गेश गुप्ता, नितेश थापा र सन्दीप सुनारले समान १ विकेट लिए ।

रुपन्देहीले शुक्रबार पहिलो खेलमा नवलपरासीलाई १ सय ६३ रनको फराकिलो अन्तरले पराजित गर्दै विजयी सुरुवात गरेको थियो । लुम्बिनी प्रदेश छनोट माघ १ गतेसम्म चल्ने छ । समूह ‘ए’ मा रुपन्देही, पाल्पा, कपिलवस्तु र नवलपरासी छन् ।

समूह ‘बी’ मा बाँके, बर्दिया र दाङ छन् । समूह ‘ए’ का सबै खेल सिद्धार्थ रंगशाला र समूह ‘बी’ का लमहीमा देउखुरी क्रिकेट मैदानमा हुने छन् । फाइनलमा दुवै समूहका शीर्ष दुई टोली सिद्धार्थ रंगशालामा भिड्ने छन् ।