काठमाडौं (हाम्रो खेलकुद) – कोहलपुर ओपन क्रिकेट प्रतियोगिताको उपाधि बिबी वारियर्स नेपालगन्जले जितेको छ । शनिवार कोहलपुर प्रस्तावित अन्तर्राष्ट्रिय क्रिकेट मैदानमा भएको फाइनलमा बिबी वारियर्सले आयोजक टिम कोहलपुर क्रिकेट एकेडेमीलाई ४ विकेटले पराजित गर्दै उपाधि जितेको हो ।

जितका लागि पाएको ९४ रनको विजयी लक्ष्य बिबी वारियर्सले १५.३ ओभरमा ६ विकेट गुमाएर पूरा गर्यो । वारियर्सका अमरसिंह रौटेलाले सर्वाधिक २९ रन बनाए । सुनिल भण्डारीले २६ रन र विजय चौधरीले १३ रन बनाए । रुपेश कुर्मीले २, अजय शहानी, रोशन शाह, लभकुश यादव र सुरज दासले १-१ विकेट लिए।

त्यस अघि टस हारेर ब्याटिङ गरेको कोहलपुर क्रिकेट एकेडेमीले निर्धारित २० ओभरमा ९ विकेटको क्षतिमा ९३ रन बनाएको थियो । सन्दीप नेपालीले सर्वाधिक अविजित ३१ रन बनाए । शेर बहादुर ओलीले १४ रन र रमेश सिंहले १० रन बनाए । विशाल पौडेलले सर्वाधिक ३ विकेट लिए । सिद्धान्त राज शाही, अमर सिंह रौटेला र आकाश विष्टले २-२ विकेट लिए।

प्रतियोगिताको उपाधि सहित बिबी वारियर्सले ५० हजार रुपैयाँ प्राप्त गर्यो भने उपविजेता टोलि कोहलपुर क्रिकेट एकेडेमीले २५ हजार रुपैयाँ प्राप्त गर्यो। प्रतियोगिताको उत्कृस्ट खेलाडी बिबी वारियर्सका कप्तान सिद्धान्त राज शाही चुनिए । सिद्धान्तले १० हजार रुपैया पाए । प्रतियोगिताको उत्कृष्ट बलर आकाश विष्ट तथा उत्कृष्ट ब्याट्सम्यान शुबेन्दु पाण्डे चुनिए । जनही ५ हजार रुपैयाँ चुनिए ।

विजेता खेलाडीहरुलाई प्रमुख अतिथि राष्ट्रिय खेलकुद परिषदका प्रशिक्षक दीपेन्द्र प्रताप सिंह, विशिष्ट अतिथि राष्ट्रिय क्रिकेट टिमका पूर्व कप्तान लेख बहादुर क्षेत्री, बाँके जिल्ला क्रिकेट संघका सदस्य तथा अन्तर्राष्ट्रिय अम्पायर मनमोहन लम्साल, बिबी साइकलका प्रोपाइटर सरिफ बागवान लगायतले पुरस्कार वितरण गरे। पुष २० गते देखि सुरु भएको प्रतियोगितामा देशभरका १६ टोलिहरु सहभागी रहेका थिए।