एजेन्सी– चार टेष्ट खेलको सिरिज अन्तर्गत तेस्रो खेल बिहीबार सिड्नी क्रिकेट मैदानमा सुरु हुँदैछ । खेल नेपाली समय अनुसार बिहान ५ः१५ बजे सुरु हुने छ । सुरुवाती दुई टेष्ट सकिँदा सिरिज १–१ को अवस्थामा छ ।

पहिलो टेष्टमा अष्ट्रेलिया र दोस्रोमा भारत समान ८ विकेटले विजयी भएका थिए । दुबै टोलीलाई सिरिजमा अग्रता लिने अवसर छ । दुवै टोली सन् २०२१ मा उत्कृष्ट सुरुवात गर्ने सोचमा हुने छन् ।

अष्ट्रेलिया टोलीको ओपनिङ विल पुकोवस्की र डेभिड वार्नरले गर्ने सम्भावना छ । घरेलु क्रिकेटमा उत्कृष्ट प्रर्दशन गर्दै आएका पुकोवस्की टेष्ट डेब्यूमै सानदार सुरुवात गर्न चाहन्छन् । वार्नरले उत्कृष्ट पूनरागमन गर्न खोज्नेछन् । सुरुवाती दुई टेष्टमा कमजोर प्रर्दशन गरेका प्रमुख ब्याट्सम्यान स्टिभ स्मिथलाई उत्कृष्ट प्रर्दशन गर्न आवश्यक देखिन्छ ।

स्मिथले कमजोर प्रर्दशनमा अष्ट्रेलियालाई जितसम्म पुग्न कठिन हुने देखिन्छ । स्मिथ पहिलो टेष्टमा १, १ र दोस्रो टेष्टमा ८ र शून्यमा आउट भएका थिए । मार्नस लाबुसेन राम्रो लयमा देखिएका छन् । बलिङमा प्याट कमिन्स, मिचेल स्टार्क र जोश हेजलवुडको जोडीको प्रर्दशन निकै महत्वपूर्ण हुने छ ।

उता भारतले तेस्रो टेष्टको लागि प्लेइङ ११ सार्वजनिक गरि सकेको छ । रोहित शर्मा र सुभमन गिलले ओपनिङ गर्नेछन् । गिलले दोस्रो टेष्टमा राम्रो ब्याटिङ गर्दा रोहित उत्कृष्ट पूनरागमन गर्न खोज्ने छन् । रोहित टेष्ट टोलीमा १४ महिनापछि फर्किएका छन् ।

चेतेश्वर पुजरा र कप्तान अजिंक्या रहानेको प्रर्दशन निकै महत्वपूर्ण हुने छ । रहानेले पछिल्लो खेलमा भारतलाई जित सम्म पुर्याउन १ सय १२ रनको शतकीय इनिङ खेलेका थिए ।

चोटका कारण उमेश यादव टोलीमा नहुँदा नवदीप सैनीले टेष्टमा डेब्यू गर्ने छन् । मोहम्मद सिराज, जस्प्रित बुमराह र सैनी तीव्र गतिका बलिङ हतियार हुने छन् । सिराज र सैनीमा टेष्ट अनुभव नहुँदा त्यसको फाइदा अष्ट्रेलिया ब्याट्सम्यान उठाउन सक्छन् ।

दुवै टोलीमा आक्रामक ओपनरले पूनरागमन गर्दै छन् । अष्ट्रेलियातर्फबाट वार्नर र भारतबाट रोहितले पूनरागमन गर्ने हुँदा यस टेष्टलाई निकै महत्वपूर्ण रुपमा समेत हेरिएको छ ।