काठमाडौं (हाम्रो खेलकुद) – राष्ट्रिय क्रिकेट टोलीका विकेटकिपर ब्याट्सम्यान विनोद भण्डारीले कोरोना भाइरस कोभिड १९ संक्रमणबाट मुक्त भएका छन् । सामाजिक सञ्जाल मार्फत २१ दिनको आइसोलेसन बसाईपछि कोरोना मुक्त भएकोमा विनोदले खुसी व्यक्त गरेका छन् ।

विनोदलाई गत मंसिर अन्तिममा चितवनको भरतपुरमा भएको गौतमबुद्ध कप प्रतियोगितापछि कोरोना संक्रमण देखिएको थियो । धुर्मुस सुन्तली फाउन्डेसनले जनस्तरबाट निर्माण गरि रहेको नमुना मैदानमा बागमती प्रदेशले आयोजना गरेको गौतम बुद्ध कप प्रतियोगितामा विनोदले राप्तीको कप्तानी गरेका थिए ।

राप्तीले फाइनलमा नारायणीलाई ९ रनले हराउँदै उपाधि जितेको थियो । उक्त फाइनलमा विनोदले ३३ रनको योगदान दिएका थिए । फाइनलपछि भने विनोदलाई कोरोना संक्रमण देखिएको थियो ।
विभागीय टोली त्रिभुवन आर्मी क्लबका कप्तान समेत रहेका विनोदले अव माघ पहिलो सातादेखि काठमाडौंमा सुरु हुने प्रधानमन्त्री राष्ट्रिय एकदिवसिय क्रिकेट प्रतियोगित तयारी गर्ने छन् ।

सोमबारमात्र राष्ट्रिय क्रिकेट टोलीका पूर्व कप्तान समेत रहेका पारस खड्काले पनि २५ दिन पछि कोरोना संक्रमणबाट मुक्त भएका थिए । कप्तान ज्ञानेन्द्र मल्ल, रोहित कुमार पौडेल र दीपेन्द्रसिंह ऐरी पनि गत मंसिरमा कोरोना संक्रमण मुक्त भएका थिए ।