एजेन्सी – श्रीलंकासँग दोस्रो टेष्ट खेलमा घरेलु टोली दक्षिण अफ्रिका १० विकेटले विजयी भएको छ । यो जितसँगै दुई टेष्ट सिरिजमा दक्षिण अफ्रिकाले क्लिनस्विप गरेको छ ।

जितका लागि पाएको ६७ रनको सामान्य लक्ष्य दक्षिण अफ्रिकाले दोस्रो इनिङमा १३.२ ओभरमा कुनै विकेट नगुमाई पूरा गर्याे । ओपनर डीएन एलगर ३१ र एडेन मारक्रम ३६ रनमा अविजित रहे ।

दोस्रो इनिङमा श्रीलंका ५६.५ ओभरमा २ सय ११ रनमा अल आउट भएको थियो । श्रीलंका ओपनर तथा कप्तान दिमुथ करुणारत्नेले १ सय २८ बलमा १९ चौका सहित १ सय ३ रनको शतकीय इनिङ खेले । अन्य ब्याट्सम्यानले राम्रो प्रर्दशन गर्न सकेनन् । लाहिरु थिरिमाने ३१, निरोसन डिक्वेला ३६ र वानिन्दु हसरंगाले १६ रनको योगदान दिए । दक्षिण अफ्रिका लुन्गी एनगिडीले ४, लुथो सिपम्लाले ३ र एनरिच नोर्कियाले २ विकेट लिए ।

दक्षिण अफ्रिका पहिलो इनिङमा ३ सय २ रनमा अल आउट भएको थियो । दक्षिण अफ्रिका ओपनर डीएन एल्गरले १ सय ६३ बलमा २२ चौका सहित सर्वाधिक १ सय २७ रनको शतकीय इनिङ खेलेका थिए । रास्सी भान डर डुसेन ६७, क्विन्टन डी कक १०, टेम्बा बाभुमा १९, एनरिच नोर्कियाले १३ र लुन्गी एनगिडीले १४ रनको योगदान दिए । श्रीलंका विश्व फ्रेर्नान्डोले सर्वाधिक ५ विकेट लिए ।

श्रीलंका पहिलो इनिङमा १ सय ५७ रनमा अल आउट भएको थियो । श्रीलंका कुशल परेराले ६० रन बनाउन बाहेक अन्यले राम्रो प्रर्दशन गर्न सकेनन् । दक्षिण अफ्रिका एनरिच नोर्कियाले ६ विकेट लिएका थिए । वियन मुल्डरको नाममा ३ विकेट रह्यो ।

पहिलो टेष्टमा दक्षिणअफ्रिका ४५ रनको इनिङ अन्तरले विजयी भएको थियो । दक्षिण अफ्रिकाले अब पाकिस्तान भ्रमण गर्ने छ । पाकिस्तान र दक्षिण अफ्रिकाबीच जनवरी अन्तिम देखि दुई टेष्ट र तीन टि२० आई सिरिज हुने छ । श्रीलंकाले इंग्ल्यान्डसँग जनवरी तेस्रो साता देखि घरेलु मैदानमा दुई टेष्ट र तीन ओडिआई सिरिज खेल्ने कार्यक्रम छ ।