काठमाडौं (हाम्रो खेलकुद) – प्रधानमन्त्री राष्ट्रिय एकदिवसिय क्रिकेट प्रतियोगिता अन्तर्गत बागमती छनोटको छैटौैं दिन काठमाडौं र भक्तपुर विजयी भएका छन् । मुलपानीमा भएको खेलमा काठमाडौंले मकावनपुरलाई ७ विकेटले पराजित गर्यो ।

टस जितेर पहिला ब्याटिङ थालेको मकवानपुर ३०.१ ओभरमा ७३ रनमा अल आउट भएको थियो । मकावनपुरका युविन बुढाथोकी १० र गौरभ खड्काले १५ रन बनाउन बाहेक अन्यले राम्रो प्रर्दशन गर्न सकेनन् ।

काठमाडौैंका युवा स्पिनर अरियो पौडेलले ७.१ ओभरमा १ मेडन सहित १७ रन खर्चेर ५ विकेट लिए । सञ्जम रेग्मीको नाममा २ विकेट रह्यो । जितका लागि पछ्याएको ७४ रनको लक्ष्य काठमाडौंले २०.२ ओभरमा ३ विकेट गुमाउँदै पूरा गर्यो । काठमाडौंका ईशान पान्डे ३२ रनमा अविजित रहे ।

जितेन्द्रसिंह ठकुरी १४ रनमा आउट भए । विपुल खनाल, राम नरेश गिरी र पियुष शर्माले १–१ विकेट लिए । त्यस्तै टीयू मैदानमा भएको अर्को खेलमा भक्तपुरले नुवाकोटलाई ८ विकेटले पराजित गर्यो ।

टस जितेर पहिला ब्याटिङ थालेको नुवाकोट ३८ ओभरमा १ सय ३५ रनमा अल आउट भएको थियो । कप्तान राजेश रिमाल ३६, प्रदीप परियार १६, आयुश बस्नेत २१, पवन राई १० र अभिराज यादवले १४ रनको योगदान दिए । कृष कार्की, सुवास खत्री र सुसान श्रेष्ठले २–२ विकेट लिए ।

जितका लागि पछ्याएको १ सय ३६ रनको विजयी लक्ष्य भक्तपुरले ३२.२ ओभरमा २ विकेट गुमाउँदै पूरा गर्यो । नविन यादव र अदित सुवेदी ६०–६० रनमा अविजित रहे । अभिराज यादव र सकर रावतले १–१ विकेट लिए ।