दाङ (हाम्रो खेलकुद) – लमहीमा जारी सगरमाथा सिमेन्ट प्रधानमन्त्री राष्ट्रिय महिला टि२० क्रिकेट प्रतियोगिता अन्तर्गत दोस्रो सेमिफाइनलमा प्रदेश १ र घरेलु टोली लुम्बिनी भिड्दै छन् । खेल दिउँसो १ बजेबाट देउखुरी क्रिकेट मैदानमा सुरु हुनेछ ।

समूह ‘ए’ लुम्बिनी प्रदेश उपविजेताको र समूह ‘बी’ बाट प्रदेश १ समूह विजेताको रुपमा सेमिफाइनलमा स्थान बनाएका हुन् । प्रदेश १ अपराजित रहँदै सेमिफाइनलमा स्थान बनाएको हो । उपाधिको दाबेदार प्रदेश १ मा राष्ट्रिय खेलाडीको बाहुल्याता छ । कप्तान रुविना बेलबासे, रोमा थापा, अप्सरी बेगम, काजल श्रेष्ठ, सबनम राई र संगिता राई जस्ता नेपालबाट खेलेको खेलाडी हुँदा लुम्बिनीमाथि सहज जित निकाल्न चाहन्छ ।

सबै खेलाडी लयमा पनि देखिएका छन् । गण्डकीविरुद्ध रोमा र काजलले अर्धशतक प्रहार गरेका थिए । जसले यी दुबै खेलाडीको मनोबल उच्च छ । सबनम राईले ४ र संगिता राईले ५ विकेट लिएपछि गण्डकी ७ रनमै अल आउट भएको थियो । संगिताले पिचको फाइदा उठाउँदै उच्च प्रर्दशन गरि रहेकी छिन् ।

सबनमले पनि उत्कृष्ट प्रर्दशन गर्दै टोलीको जित सहज बनाउँदै आएकी छिन् । सबनमको स्विङ बल विपक्ष्य ब्याटरलाई बुझ्नै गाह्रो परि रहेको देखिन्छ । रुविना र सबनम प्रमुख हतियार हुन् । नेपालबाट यू१९ खेलेका युवा अलराउन्डर निग्मा तामाङ, बलर निसा तामाङ, लाखिता राजवंशी हुँदा टोली सन्तुलित पनि बनेको छ । प्रदेश १ सहज जित निकाल्दै फाइनलमा पुग्ने रणनीतिमा छ ।

यता लुम्बिनी पनि खेलमा प्रदेश १ लाई सरप्राइज नतिजा दिन चाहन्छ । घरेलु टोली लुम्बिनीकी कप्तान नेरी थापा, युवा तीव्र गतिकी सुमिस्ता भुषाल र स्पिनर कृतिका मरासिनीको प्रर्दशन टोलीलाई महत्वपूर्ण हुने छ । कागजी रुपमा कमजोर देखिएपनि मैदानमा लुम्बिनी उच्च प्रदशन गर्न चाहन्छ । लक्ष्मी चौधरी, सरस्वती पुन र नितु भण्डारीलाई शीर्षक्रममा उत्कृष्ट प्रर्दशन गर्न आवश्यक देखिन्छ ।

लुम्बिनीको तुलनात्मक रुपमा ब्याटिङ कमजोर छ । कप्तान नेरी थापालाई आफ्नो अनुभवको फाइदा उठाउँदै उत्कृष्ट प्रर्दशन गर्न आवश्यक देखिन्छ । पिच स्पिनर उपयोगी हुँदा कृतिका र नेरीको प्रर्दशन महत्वपूर्ण हुने छ ।

लुम्बिनीले पहिलो खेलमा प्रदेश २ र कर्णालीलाई ९–९ विकेटले पराजित गर्दा एपिएफसँग ६१ रनले पराजित हुन पुगेको थियो । प्रदेश १ ले बागमतीलाई ४६ रन, सुदूरपश्चिमलाई ५ विकेट र गण्डकीलाई १ सय ४० रनले हराएको थियो ।