काठमाडौं (हाम्रो खेलकुद) – प्रधानमन्त्री राष्ट्रिय एक दिवसिय पुरुष प्रतियोगिता अन्तर्गत बागमती प्रदेश छनोट दोस्रो दिन चितवन र मवकानपुर विजयी भएका छन् ।

मकवानपुरले चितवनलाई २ सय १३ रनको फराकिलो अन्तरले हराएको छ । टस जितेर पहिला ब्याटिङ रोजेको मवकानपुरले निर्धारित ४० ओभरमा ७ विकेट गुमाउँदै २ सय ६८ रन बनाएको थियो । गौरव खड्काले ७४ बलमा ५ चौका सहित सर्वाधिक ६० रनको योगदान दिए । विशाल फुर्याल ५४ र राम नरेश गिरीले ४४ रन बनाए । अभिराज यादव, सकर रावत, अनुप श्रेष्ठले २–२ विकेट लिए ।

जितका लागि २ सय ६९ रनको विजयी लक्ष्य पछ्याएको नुवाकोट २१.५ ओभरमा ५५ रनमा अल आउट भयो । राजेश रिमाल १५ र प्रमोद रेग्मीले ११ रनको योगदान दिए । पियुश शर्मा र सुवरन भट्टले ३–३ विकेट लिए । राम नरेश गिरी र रिजन ढकालले २–२ विकेट लिए ।

अर्को खेलमा चितवनले ललितपुरमाथि १ विकेटको रोमान्चक जित हात पार्यो । टीयू मैदानमा भएको खेलमा टस जितेर पहिला ब्याटिङ रोजेको ललितपुरले ६ विकेट गुमाउँदै निर्धारित ४० ओभरमा १ सय ९६ रन बनायो । ललितपुरका विवेक रानामगरले ४५, विपिन आचार्य ३५, दुर्गेश थापा २२ र आदिल खान २१ रनमा आउट भए । चितवनका दिपेश श्रेष्ठले ३ विकेट लिए ।

जितका लागि १ सय ९७ रनको विजयी लक्ष्य पछ्याएको चितवनले ३७.४ ओभरमा ९ विकेट गुमाउँदै पूरा गरे । चितवनको जितमा गौतम केसीले २६ बलमा ३ चौका र ६ छक्का सहित ५५ रनको योगदान दिए । प्रतिक श्रेष्ठ ५७, आकाश थापा ४० र सुजन चापागाईंले १२ रनको योगदान दिए । विपिन आचार्य र सुमित झाले ३–३ विकेट लिए ।