काठमाडौं (हाम्रो खेलकुद) – विकेटकिपर ब्याट्सम्यान आदिल खानको दोहोरो शतकको सहयोगमा काठमाडौंमा जारी प्रधानमन्त्री राष्ट्रिय पुरुष क्रिकेट प्रतियोगिता अन्तर्गत बागमती छनोटमा ललितपुरले त्रिभुवन विश्वविद्यालय (टियु) लाई २ सय ९१ रनको फराकिलो अन्तरले पराजित गरेको छ ।

जितका लागि ३ सय ७६ रनको विशाल लक्ष्य पछ्याएको टीयू २९.४ ओभरमा ८४ रनमा अल आउट भयो । टीयूका पृथु बास्कोटाले ४८ बलमा ४ चौका र ३ छक्का सहित सर्वाधिक ४३ रन बनाउन बाहेक अन्यले राम्रो प्रर्दशन गर्न सकेनन् । अन्य ब्याट्सम्यानले भने दोहोरो अंकमा रन बनाउन सकेनन् । सुमित झाले ६.४ ओभरमा २ मेडन सहित १४ रन खर्चेर ४ विकेट लिए । युनिस थापा र तिलक भण्डारीले २-२ विकेट लिए ।

त्यसअघि टीयुमा टस जितेर पहिला ब्याटिङ रोजेको ललितपुरले ४० ओभरमा ४ विकेट गुमाउँदै ३ सय ७५ रन बनाएको थियो । ओपनर आदिल खानले १ सय २१ बलमा १६ चौका र १५ छक्का सहित २ सय १ रनको दोहोरो शतकीय इनिङ खेले ।

आदिलले शतक ८५ बलमा पूरा गरेका थिए । दोहोरो शतक १ सय २० बलमा पूरा गरेका थिए । आदिलले सुरुवाती ५० रन ४५ बलमा पूरा गरेका थिए । १ सय ५० रन आदिलले १ सय ४ बलमा पूरा गरेका थिए । आदिललाई अभय घर्तीमगरले क्याच आउट गराएका थिए ।

आशुतोष घिरायले ५८ बलमा १२ चौका र ३ छक्का सहित ८३ रन जोडे । पहिलो विकेटका लागि आशुतोष र आदिलले १८.३ ओभरमा १ सय ७४ रनको साझेदारी गरेका थिए ।