दाङ (हाम्रो खेलकुद) – लमहीमा जारी सगरमाथा सिमेन्ट प्रधानमन्त्री राष्ट्रिय महिला टि२० क्रिकेट प्रतियोगिता सेमिफाइनल समिकरण पूरा भएको छ ।

समूह ‘ए’ बाट एपिएफ विजेता र लुम्बिनी प्रदेश उपविजेताको रुपमा सेमिफाइनलमा स्थान बनाएका छन् । समूह ‘बी’ बाट प्रदेश १ समूह विजेता र सुदूरपश्चिम उपविजेताको रुपमा सेमिफाइनलमा पुगेका छन् । दुबै सेमिफाइनल शनिबार हुने छन् । पहिलो सेमिफाइनलमा एपिएफ र सुदूरपश्चिमबीच प्रतिस्पर्धा हुने छ । दोस्रो सेमिफाइनलमा प्रदेश १ र लुम्बिनीबीच प्रतिस्पर्धा हुने छ । फाइनल आइतबार हुने छ ।

एपिएफ तीनै खेलमा अपराजित रहँदै सेमिफाइनलमा पुगेको थियो । पहिलो खेलमा कर्णालीलाई २ सय ४ रनले हराएको एपिएफले दोस्रो खेलमा प्रदेश नम्बर २ लाई ८ विकेट र लुम्बिनीलाई ६१ रनले पराजित गरेको थियो । लुम्बिनीले पहिलो खेलमा प्रदेश २ र कर्णालीलाई ९–९ विकेटले पराजित गर्दा एपिएफसँग ६१ रनले पराजित हुन पुगेको थियो ।

समूह बी बाट प्रदेश १ पनि अपराजित रह्यो । प्रदेश १ ले बागमतीलाई ४६ रन, सुदूरपश्चिमलाई ५ विकेट र गण्डकीलाई १ सय ४० रनले हराएको थियो । सुदूरपश्चिम ३ खेलमा २ मा जित र १ मा हार सहित दोस्रो स्थानमा रह्यो । सुदूरपश्चिमले पहिलो खेलमा गण्डकीलाई ५९ रन र प्रदेश १ सँग ५ विकेटले पराजित हुँदा बागमतीलाई २८ रनले हराएको थियो ।

प्रतियोगिताको विजेताले नगद ५ लाख प्राप्त गर्ने भएका छन् । उप-विजेता टोलीले ३ लाख र सेमिफाइनलबाट बाहिरिने बाँकी दुई टोलीले २५-२५ हजार प्राप्त गर्नेछन् । विधागततर्फ सर्वोत्कृष्ट खेलाडी (प्लेयर अफ द टुर्नामेन्ट) ले २१ हजार, उत्कृष्ट ब्याटरले १० हजार र उत्कृष्ट बलरले ५ हजार प्राप्त गर्ने छन् । सेमिफाइनल शनिबार र फाइनल आइतबार हुने छ ।