दाङ (हाम्रो खेलकुद) – लमहीमा जारी सगरमाथा सिमेन्ट प्रधानमन्त्री राष्ट्रिय महिला टि२० क्रिकेट प्रतियोगिता अन्तर्गत समूह ‘बी’ का आज अन्तिम दुई खेल हुँदै छन् ।

आजको दुई खेलको नतिजाले सेमिफाइनल समिकरण पनि पूरा हुने छ । पहिलो खेलमा बागमती र सूदरपश्चिम खेल्ने छन् । दुबै टोली ‘गर वा मर’ को अवस्था छन् । यस अर्थमा उक्त खेललाई क्वाटरफाइनलको रुपमा पनि लिन सकिन्छ । जित निकाले सेमिफाइनल र पराजित भएमा बाहिरने स्पष्ट समिकरण छ । दोस्रो खेलमा प्रदेश १ र गण्डकीबीच प्रतिस्पर्धा हुने छ । खेल देउखुरी क्रिकेट मैदानमा हुने छन् ।

पहिलो खेलको नतिजा निकै महत्त्वपूर्ण छ । दुवै टोली अन्तिम खेलमा जितका साथ सेमिफाइनलमा स्थान बनाउन चाहन्छन् । बागमती पहिलो खेलमा प्रदेश १ सँग ४६ रनले पराजित भएकाे थियाे । दोस्रो खेलमा गण्डकीलाई ६५ रनले हराउँदै अघिल्लो चरणको सम्भावना जीवितै राखेको छ । यता सुदूरपश्चिम पहिलो खेलमा गण्डकीलाई ५९ रनले हराएको थियो । दोस्रो खेलमा सुदूरपश्चिम प्रदेश १ सँग ५ विकेटले पराजित हुन पर्यो ।

सुदुरपश्चिम दोस्रो खेलमा प्रदेश १ सँग पराजित भएपनि कडा चुनौती दिएको थियो । सुदूरपश्चिमका खेलाडी जितका साथ सेमिफाइनलमा स्थान पक्का गर्न चाहन्छन् । सुदूरपश्चिम ब्याटरलाई भने जिम्मेवारी इनिङ खेल्न आवश्यक देखिन्छ । आक्रामक ब्याटर डली भटट्, कविता कुवँर, रेवती धामी, मञ्जु बोगटीलाई जिम्मेवारी उठाउन निकै महत्त्वपूर्ण देखिन्छ ।

बलिङमा कविता कुवँर प्रमुख हतियार हुन् । युवा मध्यगतीकी बलर दीपा जोरा पनि बागमतीलाई घातक बन्न सक्छिन् । यता बागमतीका ओपनर कन्चन श्रेष्ठ र विन्दा कटवालले राम्रो प्रर्दशन गरेका थिए । अलराउन्डर सुमन खतिवडा टोलीकी प्रमुख हतियार हुन् । बलिङमा कप्तान अस्मिना कर्मचार्य र सुमनको प्रर्दशन निकै महत्वपूर्ण हुने छ ।

दोस्रो खेलमा प्रदेश १ र गण्डकीबीच प्रतिस्पर्धा हुने छ । प्रदेश १ लाई समूह विजेता बन्न जित आवश्यक पर्दछ । गण्डकी अप्रत्यासित नतिजा निकाल्न चाहन्छ । गण्डकीको कप्तान शीला रेग्मी क्षेत्री र सृष्टि पौडेल प्रमुख हतियार हुन् । उनको प्रर्दशन टोलीलाई निकै महत्वपूर्ण हुने छ । स्पिनर एलिसा लामिछानेले पनि सुरुवाती दुई खेलमा राम्रो प्रर्दशन गरेकी छिन् ।

यता बलिङमा उत्कृष्ट प्रर्दशन गरेपनि उपाधिको दाबेदार प्रदेश १ ब्याटिङमा संघर्षरत देखिएको छ । कप्तान रुविना क्षेत्रीको प्रर्दशन टोलीको लागि निकै महत्वपूर्ण हुने छ । रोमा थापा र काजल श्रेष्ठलाई राम्रो प्रर्दशन गर्न आवश्यक देखिन्छ । बलिङमा सबनम राई र निग्मा तामाङ घातक बन्न सक्छन् ।

समूह ‘ए’ बाट एपिएफ विजेता र लुम्बिनी उप विजेताको रुपमा सेमिफाइनलमा प्रवेश गरि सकेका छन् । समूह ‘बी’ को विजेताले लुम्बिनी र उप विजेताले एपिएफसँग सेमिफाइनलमा प्रतिस्पर्धा गर्ने छन् । सेमिफाइनल पुस १८ र फाइनल १९ मा हुने छ ।