दाङ (हाम्रो खेलकुद) – सगरमाथा सिमेन्ट प्रधानमन्त्री राष्ट्रिय महिला टि२० क्रिकेट प्रतियोगितामा बागमतीले गण्डकी प्रदेशलाई १ सय ५४ रनको बलियो लक्ष्य दिएको छ ।

देउखुरी क्रिकेट मैदानमा टस जितेर पहिला ब्याटिङ थालेको बागमतीले २० ओभरमा ४ विकेट गुमाउँदै १ सय ५३ रन बनायो । बागमतीकी ओपनर विन्दा कटवालले ५८ बलमा ३ चौका सहित सर्वाधिक ३८ रनको योगदान दिइन् । विन्दाको यो राष्ट्रिय प्रतियोगितामा डेब्यू खेल हो । युवा अलराउन्डर सुमन खतिवडाले २६ बलमा ४ चौका सहित ३१ रनको योगदान दिइन् ।

बागमतीले गण्डकीविरुद्ध ओपनिङ जोडीलाई परिवर्तन गर्दै अस्मिता खरेलको स्थानमा विन्दालाई ओपनिङ पठाएको थियो । ओपनर विन्दा र कन्चन श्रेष्ठले पहिलो विकेटका लागि १०.२ ओभरका लागि ७६ रनको साझेदारी गर्दै राम्रो सुरुवात दिलाएका थिए । अन्चन विन्दासँग राम्रो तालमेल गर्न नसक्दा २७ रनमा रन आउट हुन पुगेकी थिइन् । कन्चनले २९ बलमा १ चौका प्रहार गरिन् ।

१८ औं ओभरमा एलिसा लामिछानेले सुमन र विन्दालाई आउट गरेकी थिइन् । चौथो बलमा सुमन एलबिडब्लू आउट हुन पुगिन् । लगत्तै अर्को बलमा विन्दा अन्जली विश्वकर्माबाट क्याच आउट हुन पुगेकी थिइन् । आरती बिडारी ६ बलमा २ चौका सहित १० रनमा अविजित रहिन् । कप्तान अस्मिना कर्माचार्य ८ रनमा रन आउट भइन् ।

एलिसा लामिछानेले ४ ओभरमा २६ रन खर्चेर २ विकेट लिइन् । गण्डकीका अन्य ६ बलर भने विकेट बिहिन रहे ।