काठमाडौं (हाम्रो खेलकुद)– नेपाली पुरुष राष्ट्रिय क्रिकेट टोलीको जर्सी प्रायोजनाको अधिकार विक्री भएको छ । नेपाल क्रिकेट संघ (क्यान) ले जर्सी प्रायोजनको अधिकार एएनएस ग्रुप अफ कम्पनी मातहत रहेको एडप्याड प्रालिलाई विक्री गरेको हो ।

क्यानका अध्यक्ष चतुरबहादुर चन्द र एएनएसका अध्यक्ष सुदीप थापाले मंगलबार सम्झौता पत्रमा हस्ताक्षर गरेका थिए । सम्झौता अनुसार एडप्याडले राष्ट्रिय टोलीको जर्सीमा विज्ञापन खोज्ने र विक्री गर्ने अधिकार प्राप्त गरेको क्यानले जानकारी दिएको छ । लामो समययता राष्ट्रिय टोलीका प्रायोजक विहिन रहँदै आएको छ ।

सम्झौता १५ महिना रहने बताइएको छ । प्रायोजन रकमका बारेमा भने क्यानले सार्वजनिक गरेको छैन । एडप्याडसँग विज्ञापन क्षेत्रमा २५ वर्ष काम गरेको अनुभव रहेको बताइएको छ । एडप्याड मिडिया मार्केटिङ सम्बिन्धि काम गर्ने कम्पिनी हो ।

सम्झौता पछि क्यान अध्यक्ष चन्दले सम्झौता नेपाली क्रिकेटका लागि महत्वपूर्ण दिन भएको र यसले सकारात्मक सन्देश जाने विश्वास व्यक्त गरे । यसले आर्थिक रुपमा मात्र होइन क्रिकेटको लोकप्रियतालाई पनि सघाउ पुग्ने उनको विश्वास छ ।

सम्झौताको अवसर दिएको एएसएसका अध्यक्ष थापाले क्यानलाई धन्यवाद दिए । उनले व्यापारिक प्रयोजनका लागि नभई क्रिकेटको विकासमा साथ दिन सम्झौता गरिएको बताए ।

कोभिड १९ का कारण झन्डै ९ महिनादेखि नेपालले कुनै पनि अन्तर्राष्ट्रिय क्रिकेट खेलेको छैन । विश्व कप लिग टु अन्तर्गत ओमान र अमेरिकाविरुद्ध मार्चमा दोस्रो त्रिकोणात्म श्रृखंला खेल्ने तयारीमा छ ।