दाङ (हाम्रो खेलकुद) – कप्तान रुविना क्षेत्री बेलबासे र युवा मध्य गतिकी बलर निग्मा तामाङको उत्कृष्ट प्रर्दशनको सहयोगमा प्रदेश १ ले प्रधानमन्त्री राष्ट्रिय महिला क्रिकेट प्रतियोगितामा विजयी सुरुवात गरेको छ ।

समूह बी को दोस्रो खेलमा मंगलबार प्रदेश १ ले बागमती प्रदेशलाई ४६ रनले पराजित गर्दै विजयी सुरुवात गरेको हो । जितका लागि पाएको १ सय ७ रनको विजयी लक्ष्य पछ्याएको बागमती १६.४ ओभरमा ६० रनमा अल आउट भयो।

बागमतीकी ओपनर कञ्चन श्रेष्ठले १३, सुमन खतिवडाले १२, हेलिसा गुरुङ ८, सुजिता थापा ९ र आरती बिडारीले ८ रन बनाउन बाहेक अन्यले राम्रो प्रर्दशन गर्न सकेनन् । मध्यगतिकी बलर निग्मा तामाङले ३ ओभरमा १२ रन खर्चेर ३ विकेट लिइन् । अप्सरी बेगमले १ ओभरमा ३ रन खर्चेर २ विकेट लिइन् । सबनम राई, एलिसा कदरिया र निसा साहले १–१ विकेट लिए ।

देउखुरी क्रिकेट मैदानमा टस जितेर पहिला ब्याटिङ रोजेको प्रदेश १ ले निर्धारित २० ओभरमा ५ विकेट गुमाउँदै १ सय ६ रन बनाए । प्रदेश १ का लागि कप्तान रुविना क्षेत्री बेलबासेले ५५ बलमा ६ चौका सहित ५५ रनको योगदान दिइन् ।

पहिलो ओभरको पहिलो बलमा ओपनर काजल श्रेष्ठलाई युवा तीव्र गतीकी बलर कृष्मा गुरुङले आरतीबाट शून्यमा क्याच आउट गराएकी थिइन् । आठौं ओभरको पाँचौ बलमा स्पिनर रोमा थापालाई स्पिनर निशा तामाङले ४ रनमा एलबिडब्लू आउट गर्दै टोलीलाई तेस्रो सफलता दिलाएकी थिइन् ।

१६ औं ओभरमा कप्तान रुविना र युवा ब्याटर लाखिता राजवंशी आउट भएपछि बागमती खेलमा फर्केको थियो । दोस्रो बलमा रुविना सुमन खतिवाडा र पाँचौ बलमा निशाबाट लाखितालाई ४ रनमा क्याच गराएपछि बागमती खेलमा फर्किएको थियो ।

अप्सरी बेगम १३ बलमा १ छक्का सहित १६ रनमा अविजित रहिन् । जुन छक्का जारी प्रतियोगिताको पहिलो छक्का समेत हो । निग्मा तामाङ ५ रनमा अविजित रहिन् । स्पिनर आरती बिडारीले ३ ओभरमा १८ रन खर्चेर २ विकेट लिइन् । निग्मा तामाङ, अस्मिना कर्माचार्य र कृष्मा गुरुङले १–१ विकेट लिइन् । बुधबार पहिलो खेलमा सुदूरपश्चिम र प्रदेश १ खेल्ने छन् । दोस्रो खेलमा बागमती र गण्डकी खेल्ने छन् ।