दाङ (हाम्रो खेलकुद) – सगरमाथा सिमेन्ट महिला प्रधानमन्त्री राष्ट्रिय टि२० क्रिकेट प्रतियोगितामा प्रदेश नम्बर २ ले एपिएफलाई ७३ रनको सामान्य लक्ष्य दिएको छ ।

देउखुरी क्रिकेट मैदानमा टस जितेर पहिला ब्याटिङ रोजेको प्रदेश २ ले निर्धारित २० ओभरमा ८ विकेट गुमाउँदै ७२ रन बनाए । प्रदेश २ की ओपनर अनुराधा चौधरीले सर्वाधिक १८ रनको योगदान दिइन् ।

ओपनर सोभा आले र अनुराधा चौधरीले ७ ओभरमा २७ रनको साझेदारी गर्दै मध्यम सुरुवात दिलाएका थिइन् । तीव्र गतिकी बलर इश्वरी विष्टले सातौं ओभरको अन्तिम बलमा आलेलाई सोनु खड्काबाट १३ रनमा क्याच गराउँदै पहिलो सफलता दिलाइन् । एक ओभरपछि मेलिना रायमाझीलाई स्पिनर करुणा भण्डारीले शून्यमा बोल्ड आउट गरिन् ।

१२ औं ओभरको अन्तिम बलमा कविता गौतमसँग तालमेल नमिल्दा अनुराधा चौधरी रन आउट भएसँगै प्रदेश २ को ठूलो योगफलको सम्भावना सकिएको थियो । १३ औं ओभरको तेस्रो बलमा कप्तान सरस्वती कुमारी चौधरीलाई सीता राना मगरले शून्यमा बोल्ड आउट गरिन् ।

तल्लोक्रमका ब्याटरले पनि राम्रो प्रर्दशन गर्न सकेनन् । बिमला मगर ६, गोमा आले ३ र सरा प्रविन २ रनमा आउट भइन् । एपीएफकी सीता राना मगरले ४ ओभरमा १४ रन खर्चेर २ विकेट लिइन् । रेखा रावल, करुण भण्डारी, इश्वरी बिष्ट र राजमती ऐरीले १–१ विकेट लिए ।