एजेन्सी – कप्तान केन विलियम्सनको उत्कृष्ट ब्याटिङको सहयोगमा न्युजिल्यान्डले पाकिस्तानविरुद्ध पहिलो टेष्ट खेलमा बलियो प्रर्दशन गरेको छ ।

बे ओभलमा टस हारेर ब्याटिङ थालेको न्युजिल्यान्ड पहिलो दिनको समाप्तीमा ८७ ओभरमा २२२–३ को बलियो अवस्थामा छ । कप्तान केन विलियम्सन २ सय ४३ बलमा ८ चौका र १ छक्का सहित ९४ रनमा अविजित छन् । विलियम्सनलाई हेनरी निकोल्सले ४२ रनबाट साथ दिनेछन् । निकोल्स एक सय बलमा ४ चौका प्रहार गरेका छन् ।

घरेलु टोलीको सुरुवात भने राम्रो हुन सकेन । पहिलो ओभरको तेस्रो बलमा शाहिन अफ्रिदीले अजहर अलीबाट ओपनर टम लाथमलाई ४ रनमा क्याच आउट गराए । अफ्रिदीले ११ औं ओभरको दोस्रो बलमा टम ब्यान्डेललाई ५ रनमा यासिर शाहबाट क्याच गराए ।

तेस्रो विकेटका लागि विलियम्सन र रस टेलरले १ सय २० रनको साझेदारी गर्दै बलियो सुरुवात दिलाएका थिए । अफ्रिदीलेनै ५७ औं ओभरमा टेलरलाई विकेटकिपर मोहम्मद रिजवानबाट ७० रनमा क्याच आउट गर्दै उक्त साझेदारी तोडे । टेलरले १ सय ५१ बलमा १० चौका र १ छक्का प्रहार गरे ।

चौथो विकेटका लागि निकाल्स र विलियम्सनले ८९ रनको साझेदारी गरि सकेका छन् । पाकिस्तानका युवा तीव्र गतिका बलर शाहिन अफ्रिदीले २० ओभरमा ५ मेडन राख्दै ५५ रन खर्चेर ३ विकेट लिए । अन्य बलरले भने विकेट लिन सकेका छैनन् ।