दाङ (हाम्रो खेलकुद) – सगरमाथा सिमेन्ट महिला प्रधानमन्त्री राष्ट्रिय टि२० क्रिकेट प्रतियोगिताको लागि उपाधिको दाबेदार तथा साविक विजेता एपिएफले आफ्नो १४ सदस्य टोली घोषणा गरेको छ ।

राष्ट्रिय टोलीकी उपकप्तान समेत रहेकी सीता रानामगरको कप्तानीमा एपिएफले बलियो टोली घोषणा गरेको छ । यस पटक तीव्र गतिकी बलर ईश्वरी विष्टले एपिएफबाट खेल्ने छिन् । यसअघि इश्वरीले सुदूरपश्चिम प्रदेशबाट खेल्ने गर्दथिइन् । समूह ए मा एपिएफसँगै लुम्बिनी, कर्णाली र प्रदेश नम्बर २ छन् ।

एपिएफले शनिबार कर्णाली प्रदेशसँग खेल्दै प्रतियोगिता सुरुवात गर्नेछ । आइतबार एपिएफले प्रदेश २ विरुद्ध खेल्ने छ । सोमबार लुम्बिनीविरुद्ध खेल्ने छ । सेमिफाइनल पुस १८ र फाइनल पुस १९ मा हुने छ । सबै खेल लमहीमा रहेको देउखुरी क्रिकेट मैदानमा हुने छन् ।

समूह बी मा सुदूरपश्चिम, बागमती, गण्डकी र प्रदेश नम्बर १ छन् । दुवै समूहका शीर्ष २ टोलीले सेमिफाइनलमा प्रतिस्पर्धा गर्नेछन् । फाइनल पुष १९ गते हुनेछ । प्रतियोगिता को प्रत्यक्ष प्रसारण एक्सन स्पोर्ट्स एचडीले गर्नेछ । शनिबारदेखि सुरु हुने प्रतियोगिताको विजेताले नगद ५ लाख प्राप्त गर्ने भएका छन् । उप-विजेता टोलीले ३ लाख र सेमिफाइनलबाट बाहिरिने बाँकी दुई टोलीले २५-२५ हजार प्राप्त गर्नेछन् ।

विधागततर्फ सर्वोत्कृष्ट खेलाडी (प्लेयर अफ द टुर्नामेन्ट) ले २१ हजार, उत्कृष्ट ब्याटरले १० हजार र उत्कृष्ट बलरले ५ हजार प्राप्त गर्ने छन् । हरेक खेलका प्लेयर अफ द म्याचले २ हजार प्राप्त गर्ने आयोजकले जनाएको छ ।

एपिएफ टोली : सीता रानामगर (कप्तान), बिनु बुढामगर, ज्योती पान्डे, सुष्मा श्रेष्ठ, प्यारी चौधरी, सुमन बिष्ट, ममता चौधरी, सरिता मगर, ईन्दु बर्मा, करुणा भण्डारी, सोनु खड्का, रेखा रावल, खिना कुमारी थापा, ईश्वरी विष्ट र राजमति ऐर ।

ब्यवस्थापक : रबिना राई

प्रशिक्षक : राजेश श्रेष्ठ

मेडिकल ः सन्जु लामा