दाङ (हाम्रो खेलकुद) – दाङको लमहीमा रहेको देखुरी अन्तर्राष्ट्रिय क्रिकेट मैदानमा शनिबार सुरु हुने महिला प्रधानमन्त्री राष्ट्रिय टि ट्वान्टी क्रिकेट प्रतियोगिताको प्रत्यक्ष प्रसारण डिस मिडिया नेटवर्कको एक्सन स्पोर्टस च्यानलले गर्ने भएको छ ।

नेपाल क्रिकेट संघ (क्यान) का अध्यक्ष चतुरबहादुर चन्द र डिस मिडियाका प्रबन्ध निर्देशक सुदीप आचार्यले प्रत्यक्ष प्रसारणका लागि बिहीबार सम्झौता पत्रमा हस्ताक्षर गरेका थिए । क्यानका अध्यक्ष चन्दका अनुसार एक्सन स्पोर्टसले महिला र पुरुष दुवै प्रधानमन्त्री कप प्रतियोगिता प्रत्यक्ष प्रसारण गर्नेछ ।

पुरुष प्रतियोगिताको मिति भने तय भएको छैन । पुरुष पिएम कप ५० ओभरको काठमाडौंमा हुने बताइएको छ । प्रत्यक्ष प्रसारणको सम्झौता रकम भने खुलाउन नमिल्ने चन्दले बताए । महिला पिएम कप प्रतियोगिता पुस ११ देखि १९ सम्म लमहीमा चल्ने छ ।

प्रतियोगितामा ७ प्रदेश र एपिएफबीच प्रतिस्पर्धा हुने छ । समूह ‘ए’ मा एपिएफ, प्रदेश नम्बर २, कर्णाली र लुम्बिनी छन् । समूह ‘बी’ मा सुदूरपश्चिम, बागमती, गण्डकी र प्रदेश नम्बर १ छन् ।उद्घाटन खेलमा लुम्बिनी र प्रदेश नम्बर २ बीच प्रतिस्पर्धा हुने छ ।

समूह चरणका खेल पुस १६ सम्म चल्ने छन् । प्रतियोगिता २० ओभरको हुने छ । पहिलो खेल बिहान ९ः०० बजे र दोस्रो खेल १ः०० बजेबाट सुरु हुने छ । दुई समूहबाट शीर्ष दुई टोली सेमिफाइनलमा पुग्ने छन् । दुवै सेमिफाइनल पुस १७ र फाइनल पुस १९ गते हुनेछ ।