एजेन्सी – इन्डियन प्रिमियर लिग (आइपिएल) २०२२ देखि १० टोली हुने भएका छन् । भारतीय क्रिकेट कन्ट्रोल बोर्ड (बिसिसिआई) को बिहिबार अहमदाबादमा बसेको बोर्ड बैठकले सन् २०२२ देखि १० टोली सहभागी गराउने निर्णय गरेको छ ।

२०२१ मा भने ८ टोलीले नै प्रतिस्पर्धा गर्नेछन् । २०२१ को आइपिएल सुरु हुन अब चार महिना बाँकी हुँदा ८ टोलीलाई नै निरन्तरता दिने निर्णय गरिएको हो । आइपिएल २००८ देखि ८ टोलीको सहभागितामा सुरु भएको थियो ।

कोरोना महामारीको कारण यस पटकको आइपिएल दुई महिना अघि संयुक्त अरब इमिरेट्स (यूएई) मा सम्पन्न भई सकेको छ । दिल्ली क्यापिटल्सलाई हराउँदै मुम्बई इन्डियन्सले उपाधि जितेको थियो । मुम्बईको आइपिएलको त्यो पाँचौ उपाधि थियो । १० टोली सहभागी भएपछि आइपिएलमा कुल ९४ खेल हुने छन् ।

आइपिएलमा १० टोलीबीच एकै संस्करणमा प्रतिस्पर्धा भने भइसकेको छ । २०११ मा पहिलो पटक १० टोलीले प्रतिस्पर्धा भएको थियो । उक्त सिजनमा पुणे वारियर्स र कोची टस्कर्स थपिएका थिए ।

२०१२/१३ मा आइपिएलमा ९ टोलीले प्रतिस्पर्धा गरेका थिए । ९ र १० टोलीलाई होम अवेको आधारमा खेलाउँदा प्रतियोगिता धेरै लामो हुने हुँदा २०१४ देखि ८ टोलीबीच प्रतिस्पर्धा हुँदै आएको थियो ।