काठमाडौं (हाम्रो खेलकुद) – कप्तान सिद्धान्त लोहनीको उत्कृष्ट प्रर्दशनको सहयोगमा मोरङ प्रधानमन्त्री राष्ट्रिय एकदिवसिय क्रिकेट प्रतियोगिता अन्तर्गत प्रदेश नम्बर १ को छनोटको फाइनलमा पुगेको छ ।

मोरङले सोमबार झापालाई ९ रनले हराउँदै एक खेल अगावै फाइनलमा स्थान पक्का गरेको हो । कनकाई मैदानमा टस जितेर पहिला ब्याटिङ रोजेको मोरङ ३८.३ ओभरमा १ सय ४० रनमा अल आउट भएको थियो । मोरङका मुकुन्द यादवले ४३ बलमा ४ चौका सहयोगमा सर्वाधिक ३१ रनको योगदान दिए ।

दीपक पासवान १८, रवि रोय १६, सिद्धान्त लोहनी १५ र फिर्दोस अन्सारीले १३ रनको योगदान दिए । झापाका प्रवेश कमातले १० ओभरमा २६ रन खर्चेर ४ विकेट लिए । ज्ञानेन्द्र श्रेष्ठ २, मनोज तामाङ, सुमिरन राई र अंकित सुवेदीले १–१ विकेट लिए ।

जितका लागि १ सय ४१ रनको विजयी लक्ष्य पछ्याएको झापा २८.२ ओभरमा १ सय ३१ रनमा अल आउट हुन पुगेको थियो । झापाका सुमिरन राईले ३७ र नित्य खडोलियाले ४८ रनको योगदान दिए । अन्यले राम्रो प्रर्दशन गर्न सकेनन् । मोरङलाई जिताउन सिद्धान्त लोहनीले ६.२ ओभरमा २ मेडन राख्दै २६ रन खर्चेर प्रमुख ४ विकेट लिए । फिर्दोस अन्सरी र श्रवन यादवले ३–३ विकेट लिए ।

मंगलबार हुने झापा र सुनसरीबीचको विजेताले उपाधिको लागि मोरङसँग फाइनलमा प्रतिस्पर्धा गर्ने छ । मंगलबार मोरङले उदयपुरसँग प्रतिस्पर्धा गर्ने छ । फाइनल बुधबार हुने छ ।