काठमाडौं (हाम्रो खेलकुद) – प्रधानमन्त्री राष्ट्रिय एकदिवसिय क्रिकेट प्रतियोगिता अन्तर्गत प्रदेश नम्बर १ छनोटमा आइतबार झापा र मोरङ विजयी भएका छन् । झापाले उदयपुरलाई ७ विकेट र मोरङले इलामलाई १० विकेटले पराजित गरे ।

झापाविरुद्ध टस जितेर पहिला ब्याटिङ थालेको उदयपुर १५.५ ओभरमा ६६ रनमा अल आउट भएको थियो । उदयपुरका विधान गोस्वामीले २३ बलमा २ चौका र ५ छक्का सहित सर्वाधिक ४१ रनको योगदान दिए । अन्य कुनैपनि ब्याट्सम्यानले राम्रो प्रर्दशन गर्न सकेनन् ।

झापाका मनोज तामाङले ६.५ ओभरमा १ मेडन राख्दै २२ रन खर्चेर ५ विकेट लिए । कमल खत्रीले ३ विकेट लिए । जितका लागि ६७ रनको समान्य लक्ष्य झापाले ७.२ ओभरमा ३ विकेट गुमाउँदै पूरा गर्यो । झापाका अंकित सुवेदीले २९ रनको योगदान दिए । विधान गोस्वामीले २ विकेट लिए ।

त्यस्तै अर्को खेलमा मोरङले इलामलाई १० विकेटले पराजित गर्यो । पहिला ब्याटिङ गरेको इलाम १७ ओभरमा ६६ रनमा अल आउट भएको थियो । अविनास पौडेलले सर्वाधिक २३ रनको योगदान दिए । मोरङका आषिश श्रेष्ठले ८ ओभरमा ४ मेडन राख्दै १७ रन खर्चेर ५ विकेट लिए ।

जितका लागि ६७ रनको सामान्य लक्ष्य मोरङले ६ ओभरमा कुनै विकेट नगुमाई पूरा गरेको थियो । मोरङका दीपक पासवानले २२ बलमा ४४ रनको योगदान दिए ।