काठमाडौं (हाम्रो खेलकुद) – राष्ट्रिय महिला क्रिकेट टोलीकी कप्तान रुविना क्षेत्रीले प्रधानमन्त्री महिला राष्ट्रिय एकदिवसिय क्रिकेट प्रतियोगिता अन्तर्गत प्रदेश नम्बर १ छनोटमा विष्फोटक शतक प्रहार गरेकी छिन् ।

झापाकी कप्तान समेत रहेकी रुविनाले इलामविरुद्ध विष्फोटक शतक प्रहार गरेकी हुन् । रुविनाको उत्कृष्ट शतकको सहयोगमा झापाले इलामलाई २ सय ११ रनको फराकिलो अन्तरले हराएको छ । टस जितेर पहिला ब्याटिङ गरेको झापाले निर्धारित २० ओभरमा २ विकेट गुमाउँदै २ सय ६७ रन बनाएको थियो ।

रुविनाले ५६ बलमा १५ चौका र ९ छक्का सहित १ सय २९ रनको विष्फोटक शतकीय इनिङ खेलेकी थिइन् । ओपनर अप्सरी बेगमले ४१ बलमा ६१, लाखिता राजवंशी १३ र काजल श्रेष्ठले १८ रनको योगदान दिइन् । इलामले ५३ रन एक्स्ट्रा स्वरुप दिएको थियो ।

जितका लागि २ सय ६८ रनको विशाल लक्ष्य पछ्याएको इलामको महिला टोली ५६ रनमा अल आउट हुन पुगेको थियो । इलामकी प्रज्ञा कटवालले १२, सोभा अधिकारी १०, पयाल मगरले ११ रन बनाउन बाहेक अन्य कुनैपनि ब्याटरले राम्रो प्रर्दशन गर्न सकेनन् ।

झापाका अहिसाले सर्वाधिक ३ विकेट लिइन् । ज्योती दनुवार र रोमा थापाले २–२ विकेट लिए । उपाधिका लागि सोमबार झापा र मोरङबीच प्रतिस्पर्धा हुने छ ।