काठमाडौं (हाम्रो खेलकुद) – प्रधानमन्त्री राष्ट्रिय एकदिवसिय क्रिकेट प्रतियोगिता अन्तर्गत प्रदेश नम्बर १ छनोटमा शनिबार मोरङ र उदयपुर विजयी भएका छन् ।

उदयपुरले इलामलाई ४८ रन तथा मोरङले सुनसरीलाई ३ विकेटले हराउँदै जित निकालेका हुन् । झापामा भएको खेलमा इलामविरुद्ध उदयपुरले टस जितेर पहिला ब्याटिङ गर्दै २४.२ ओभरमा अल आउट हुँदै १ सय ५२ रन जोडेको थियो ।

उदयपुरका दीपक जोशीले सर्वाधिक ३० रनको योगदान दिए । प्रवत राई १६, प्रकाश सुवेदी १८, अब्रिन्द सुवेदीले १४ रनको योगदान दिए । इलामका हेमन राईले सर्वाधिक ४ विकेट लिए । प्रज्वल खत्री र योगेश बिकेले २–२ विकेट लिए ।

१ सय ५३ रनको विजयी लक्ष्य पछ्याएको इलाम २७.४ ओभरमा १ सय ४ रनमा अल आउट भएको थियो । इलामका ओपनर रोशन बोहरा ४९ रन बनाउन बाहेक अन्य कुनैपनि ब्याट्सम्यानले राम्रो प्रर्दशन गर्न सकेनन् । उदयपुरका आकाश सेवाले सर्वाधिक ४ विकेट लिए । दीपक जोशीको नाममा ३ विकेट रह्यो ।

अर्को खेलमा मोरङले सनुसरीलाई ३ विकेटले पराजित गरेको थियो । टस जितेर पहिला ब्याटिङ थालेको सुनसरी ४९.५ ओभरमा १ सय ९५ रनमा अल आउट भएको थियो । सुनसरीका गौरव कटवालले ४०, सोनु मण्डलले ३८ र विवेकले २९ रनको योगदान दिए । मोरङका श्रवण यादव र फिर्दोस अन्सराीले २–२ विकेट लिए ।

१ सय ९६ रनको लक्ष्य पछ्याएको मोरङले ७ विकेटको क्षतिमा पूरा गरेको थियो । मोरङको जितमा फिर्दोस अन्सारीले उत्कृष्ट प्रर्दशन गर्दै ९४ बलमा ८ चौका सहित ६० रनमा अविजित रहे । रवि रोय १९, सिद्धान्त लोहनी २२ र राजन मगरले ४६ रनको योगदान दिए । सुनसरीका जोशक खड्का र गौरव कटवालले २–२ विकेट लिए ।