एजेन्सी – बिग ब्यास लिग २०२०/२१ सिजनको सातौं खेलमा तीव्र गतिका बलिङ अलराउन्डर ड्यानियल साम्सको उत्कृष्ट अलराउन्ड प्रर्दशनमा सिड्नी थन्डरले ब्रिस्बेन हिटलाई ४ विकेटले पराजित गरेको छ ।

जितका लागि १ सय ७९ रनको विजयी लक्ष्य पछ्याएको सिड्नीले १८.५ ओभरमा ६ विकेट गुमाउँदै पूरा गर्यो । सिड्नीको जितमा तल्लोक्रमका ड्यानियल साम्सले आक्रामक ब्याटिङ गर्दै २५ बलमा ३ चौका र ७ छक्का सहित ६५ रनमा अविजित रहँदै जित पक्का गरे । सिड्नीले सुरुवात भने खराब गरेको थियो ।

ओपनर उस्मान खवाजा १७, एलेक्स हेक्स र कलुम फर्गुसन शून्यमा आउट भएका थिए । एलेक्स रोस ३४, बक्सटर होल्ट २९ र बेन कटिङ २३ रनमा आउट भए । हिटका ज्याक वाइल्डर्मुथले ४ ओभरमा २३ रन खर्चेर ३ विकेट लिए ।

त्यसअघि टस जितेर पहिला ब्याटिङ रोजेको हीटले निर्धारित २० ओभरमा ६ विकेट गुमाउँदै १ सय ७८ रन बनाएको थियो । कप्तान क्रिस लिनले ४४ बलमा ३ चौका र ५ छक्का सहित सर्वाधिक ६९ रनको योगदान दिएपनि बलर नचल्दा टोलीलाई जित दिलाउन सकेनन् ।

ड्यान लरेन्स २०, ज्याक वाइल्डर्मुथ ३१, साम हिजलेट २० र म्याक्स ब्रायन्ट २९ रनमा आउट भए । सिड्नीका ड्यानियल साम्स र जोनाथन कुकले २–२ विकेट लिए ।