एजेन्सी – बिग ब्यास लिग २०२०/२१ सिजनको छैटौं खेलमा सिड्नी सिक्सर्सले मेलबर्न रेनेगड्सलाई १ सय ४५ रनको फाराकिलो अन्तरले पराजित गरेको छ ।

आइतबार सम्पन्न खेलमा जितको लागि २ सय ६ रनको विशाल विजयी लक्ष्य पछ्याएको रेनेगड्स १०.४ ओभरमा ६० रनमा अल आउट हुन पुग्यो । रेनेगड्सका शन मार्स, केन रिचर्डसन् र ज्याक फ्रेजर म्याकगुर्कले १३–१३ तथा कप्तान आरोन फिन्चले १२ रन बनाउन बाहेक अन्यले सम्झन योग्य प्रर्दशन गर्न सकेनन् ।

रेनेगड्सका चार खेलाडीले खाता खोल्न सकेका थिएनन् । सिक्सर्सका बेन ड्यारहुसीले २.४ ओभरमा १३ रन खर्चेर ४ विकेट लिए । स्टिभ ओकीफले ३ र कार्लोस ब्रेथवेटले २ विकेट लिए ।

त्यसअघि टस हारेर ब्याटिङ थालेको सिक्सर्सले निर्धारित २० ओभरमा ४ विकेट गुमाउँदै २ सय ५ रन बनाएको थियो । युवा ओपनर तथा विकेटकिपर ब्याट्सम्यान जोश फिलिपेले ५७ बलमा ९ चौका र ३ छक्का सहित सर्वाधिक ९५ रनको योगदान दिए । फिलिपेनै खेलको ‘प्लेयर अफ द म्याच’ चुनिए ।

ज्याक एडवार्डस १, जेम्स भिन्स १७ र कप्तान ड्यानियल हक्स ३२ रनमा आउट भए । तल्लोक्रममा जोर्डन सिल्क १९ बलमा ७ चौका र १ छक्का सहित ४५ रनमा अविजित थिए । रेनेगड्सका पिटर हाटजोग्लोले २, जोस लालोर र केन रिचर्ड्सनले एक एक विकेट लिए ।