काठमाडौं (हाम्रो खेलकुद) – नेपाल क्रिकेट संघ (क्यान) ले बन्द प्रशिक्षणमा रहेका नेपाली राष्ट्रिय क्रिकेट टोलीका खेलाडीहरुलाई प्रशिक्षण क्याम्पबाट फुकुवा गर्ने भएको छ । गौतम बुद्ध कपपछि प्रधानमन्त्री कपमा सहभागी हुन खेलाडीलाई फुकुवा गरिने भएको हो ।

धुर्मुस सुन्तली फाउन्डेसनद्वारा भरतपुरको चितवनमा जनस्तरमा निर्माण भइरहेको रहेको गौतम बुद्ध क्रिकेट रंगशालाको नमुना मैदानमा शनिबारदेखि गौतम बुद्ध कप सुरु हुँदैछ । बागमती प्रदेश क्रिकेट संघको आयोजनामा हुने उक्त प्रतियोगितामा नारायणी, राप्ती र बागमती गरी तीन टोलीले प्रतिस्पर्धा गर्ने छन् । सबै टोलीमा क्यानले राष्ट्रिय टोलीमा बन्द प्रशिक्षणमा बोलाएका खेलाडीहरु छन् ।

बागमती प्रदेशका सचिव तथा क्यानका केन्द्रिय सदस्य दुर्गाराज पाठकलले गौतम बुद्ध कप प्रशिक्षणकै पाटोको रुपमा भएपनि क्यानलाई आर्थिक भार नपर्ने बताउछन् । क्यानले यस प्रतियोगिता समापनसँगै बन्द प्रशिक्षणमा खेलाडीलाई राख्ने छैन । टोलीले २ साता प्रशिक्षण गरेको हो ।

‘क्यानले प्राविधिक रुपमा मात्र सहयोग गर्छ । अन्य सबै खर्च प्रदेशले बेहोर्ने हो । यसलाई क्याम्प भित्रकै प्रतियोगिताको रुपमा लिएका छौं । ३० गतेपछि प्रधानमन्त्री राष्ट्रिय क्रिकेट प्रतियोगिता लागि सबै खेलाडीलाई छोड्ने छौं । विभाग, प्रदेश र जिल्लाबाट खेल्ने खेलाडीले त्यसपछि तयारी गर्ने छन्’, पाठकले भने ।

‘प्रशिक्षण अघि सबै खेलाडीको पिसिआर परिक्षण गरेका थियौं । यस प्रतियोगितापछि खेलाडीले पिएम कपको तयारी गर्नेछन् । बन्द प्रशिक्षण सुरु भएपछि हामी फेरि खेलाडीको पिसिआर परिक्षण गर्नेछौं’, उनले भने ।

टियू क्रिकेट मैदान स्तरको हिसाबले नेपालको उत्कृष्ट मैदान भएपनि क्यानले चितवन जानु बाध्यता रहेको बताए । पाठकले क्यानसँग आवश्यक बजेट नभएकै कारण गौतम बुद्ध कप खेल्ने योजना बनेको जानकारी दिए । भरतपुर महानगरपालिका र अन्य संस्थाबाट सहयोग हुने भएपछि चितवनमै प्रतियोगिता हुन लागेको हो ।

‘भरतपुर महानगरपालिकाले गौतम बुद्ध कपको लागि १० लाख र प्रदेश सरकारले ५ लाख रुपैयाँ सहयोग गरेको छ । भरतपुरले लगानी गरेको प्रतियोगिता काठमाडौंमा गर्ने कुरा त भएन । अर्कोतर्फ चितवनमा गर्दा मैदानको राम्रो प्रचार प्रचार पनि हुन्छ । त्यो हिसाबले पनि चितवनमै गर्न लागेका हौं’, उनले भने ।

गौतम बुद्ध कपसँगै क्रिकेटको माहोल फर्कने पाठकले अपेक्षा राखेका छन् । ‘खेलाडी लामो समयदेखि खेलेका छैनन् । चार वटा खेल खेल्न पाउनु राम्रो कुरा हो । खेल नभएको पनि धेरै भएको थियो । क्यानसँग तत्काल आफैं प्रतियोगिता गर्न पैसा छैन । राष्ट्रिय प्रतियोगिता नै गर्न कठिन परिरहेको छ’, उनले भने ।