एजेन्सी – मध्यक्रमका ब्याट्सम्यान हेनरी निकोल्सको अविजित शतकमा न्युजिल्यान्ड वेस्टइन्डिजसँगको दोस्रो तथा अन्तिम टेष्ट खेलमा पहिलो दिन पहिलो इनिङमा बलियो अवस्थामा छ ।

वेलिंग्टन मा टस हारेर ब्याटिङ थालेको न्युजिल्यान्ड ८४ ओभरमा २९४–६ को अवस्थामा पहिलो दिन समाप्त भएको छ । न्युजिल्यान्डका हेनरी निकोल्स २ सय ७ बलमा १५ चौका र १ छक्का सहित १ सय १७ रनमा अविजित छन् । निकोल्सलाई युवा अलराउन्डर काइल जामिसनले एक रन बाट दोस्रो दिन साथ दिने छन् । निकोल्सको यो टेष्ट करिअरको यो छैटौं शतक हो ।

सातौं ओभरमा शनोन ग्रेबियलले ओपनर टम ब्लन्डेललाई १४ रनमा बोल्ड आउट गरे । ओपनर तथा कार्यवाहक कप्तान टम लाथमलाई चेमार होल्डरले २७ रनमा जोशुवा डी सिल्भाबाट क्याच गराउँदै पेभिलिएन फर्काएका थिए । लाथमले ५३ बलमा ४ चौका प्रहार गरे । विल योंग ८७ बलमा ४ चौका सहित ४३ रनमा क्याच आउट भए । योंगलाई ग्रेबियलले होल्डरबाट क्याच गराए ।

अनुभवी ब्याट्सम्यान रस टेलर ९ रनमा क्याच आउट हुन पुगे । बिजे वाटलिङ ३० र डर्याल मिचेल ४२ रनमा आउट भए । वेस्टइन्डिजका तीव्र गतिका बलर शनोन ग्रेबियलले ३, चेमार होल्डरले २ र अल्जारी जोशेफले एक विकेट लिएका छन् ।

पहिलो टेष्टमा वेस्टइन्डिज १ सय ३४ रनको इनिङ अन्तरले पराजित भएको थियो । न्युजिल्यान्ड दुई टेष्ट सिरिज क्लिनस्विप गर्न चाहन्छ भने वेस्टइन्डिज १–१ को बराबरीमा अन्त्य गर्ने सोचमा छ ।