काठमाडौं (हाम्रो खेलकुद) – प्रधानमन्त्री राष्ट्रिय एक दिवसिय क्रिकेट प्रतियोगिता अन्तगर्त प्रदेश नम्बर २ छनोटको समूह ‘ए’ को पहिलो खेलमा महोत्तरीले विजयी सुरुवात गरेको छ ।

बिहीबार प्रदेश २ छनोटको पहिलो खेलमा महोत्तरीले धनुषालाई ७ विकेटले हराउँदै विजयी सुरुवात गरेको हो । धनुषाले जितको लागि प्रस्तुत गरेको २ सय १० रनको विजयी लक्ष्य पछ्याएको महोत्तरीले ४८.३ ओभरमा ३ विकेटको क्षतिमा पूरा गर्यो । महोत्तरीको जितमा ओपनर राज कुमार साहनी १ सय ४४ बलमा ५ चौका र २ छक्का सहित ९३ रनमा अविजित रहँदै खेलको म्यान अफ द म्याच चुनिए ।

ओपनर अविनास अधिकारी ४, सौरभ २२ र रवि सिंह ९ रनमा आउट भए । अरुण मण्डल ८१ बलमा ५८ रनमा अविजित रहे । धनुषाका दिब्यान्सु मलिक, मनोज यादव र विशाल सुश्लिङले एक एक विकेट लिए ।

त्यसअघि टस जितेर ब्याटिङ रोजेको धनुषाले ५० ओभरमा ९ विकेट गुमाउँदै २ सय ९ रन बनाएको थियो । कप्तान तथा ओपनर हरि शंकर शाहले १ सय ८ बलमा ८ चौका सहित सर्वाधिक ६७ रनको योगदान दिएपनि टोलीलाई जिताउन सकेनन् । हिमान्शु दत्त १६, विशाल सुश्लिङ ५ र प्रसुराम यादव ६ रनमा आउट भए ।

तल्लोक्रममा अमितले ३६ बलमा २ चौका र ३ छक्का सहित ४४ रन जोड्दै इनिङ उकासेका थिए । मोहत्तरीका मोहम्मद हुसैनले १० ओभरमा १ मेडन सहित ४० रन खर्चेर ४ विकेट लिए । पुरजले ३, निसान राउत र राहुल प्रताव सिंहले एक एक विकेट लिए ।

प्रधानमत्री कपको लागि प्रदेश २ को छनोटमा बिहिबार देखी पुष ५ सम्म आठ टोलीले दुई समूहमा प्रतिस्पर्धा गर्ने छन् । समूह ‘ए’ मा धनुषा, महोत्तरी, सिराह र सप्तरी छन् । समूह ‘बी’ मा सर्लाही, पर्सा, बारा र रौतहट छन् । समूह चरणमा सबै टोलीले एक अर्का टोलीबीच खेल्ने छन् ।

समूहका शीर्ष दुई दुई टोली सेमिफाइनल खेल्ने छन् । यस प्रतियोगिताको प्रर्दशनलाई आधार मान्दै पुष दोस्रो साता देखि काठमाडौंमा सुरु हुने प्रधानमन्त्री राष्ट्रिय एक दिवसिय कपको लागि प्रदेश २ ले आफ्नो टोली घोषणा गर्ने छ ।