एजेन्सी – अष्ट्रेलियाका शीर्षक्रमका ब्याट्सम्यान स्टिभ स्मिथले भारतविरुद्ध लगातार दोस्रो शतक प्रहार गरेका छन् ।

पहिलो ओडिआई खेलमा १ सय ५ रनको शतकीय इनिङ खेल्दै प्लेयर अफ द म्याच चुनिएका स्मिथले दोस्रो खेलमा पनि सानदार शतक प्रहार गर्दै विशाल योगफलको बाटो देखाएका छन् । स्मिथले ६२ बलमा आफ्नो ओडिआई करिअरको ११ औं शतक पूरा गरे । यसअघि पनि पहिलो खेलमा ६२ बलमै शतक पूरा गरेका थिए ।

स्मिथ शतक बनाए लगत्तै अर्को ओभरमा आउट भए । उनले ६४ बलमा १४ चौका र २ छक्का सहित १ सय ४ रनको योगदान दिए । उनी हार्दिक पान्ड्याको बलमा शामीको हातबाट क्याच आउट भए । तेस्रो विकेटका लागि स्मिथ र लाबुसेनले १ सय ३६ रनको साझेदारी गरे । मार्नस लाबुसेन ३९ रनमा खेलिरहेका छन् ।

सिड्नी क्रिकेट मैदानमा टस जितेर पहिला ब्याटिङ रोजेको घरेलु टोली अष्ट्रेलियाले सुरुवाती ४१.२ ओभरमा ३ विकेट गुमाउँदै २ सय ९२ रन बनाएको छ । ओपनर आरोन फिन्च र डेभिड वार्नरले दोस्रो खेलमा पनि लगातार शतकीय साझेदारी गर्दै उत्कृष्ट सुरुवात दिलाएका थिए । फिन्च र वार्नरले पहिलो विकेटका लागि २२.५ ओभरमा १ सय ४२ रनको उत्कृष्ट साझेदारी गर्दै उत्कृष्ट सुरुवात दिलाएका हुन् ।

मोहम्मद सामीको बलमा एज लागेर फिन्च एक्स्ट्रा कभरमा कप्तान विराट कोहलीबाट क्याच आउट हुन पुगे । फिन्चले ६९ बलमा ६ चौका र १ छक्का सहित ६० रन जोडे । २६ औं ओभरको तेस्रो बलमा दुई रन लिने क्रममा डेभिड वार्नरलाई श्रेयस ऐरले डाइरेक्ट स्टम्पमा ताक्दै रन आउट गरेपछि शतक बनाउन चुके । डेभिड वार्नर ७७ बलमा ७ चौका र ३ छक्का सहित ८३ रनमा रन आउट भए ।