एजेन्सी – मध्यक्रमका ब्याट्सम्यान जोनी बेयरस्टोको उत्कृष्ट प्रर्दशनमा इंग्ल्यान्डले पहिलो टि२० खेलमा घरेलु टोली दक्षिण अफ्रिकालाई ५ विकेटले पराजित गरेको छ । यो सँगै तीन टि२० आई खेलको सिरिजमा इंग्ल्यान्डले १–० को अग्रता लिएको छ ।

जितका लागि १ सय ८० रनको विजयी लक्ष्य इंग्ल्यान्डले १९.२ ओभरमा ५ विकेटको क्षतिमा पूरा गर्यो । इंग्ल्यान्डको जितमा मध्यक्रमका ब्याट्सम्यान जोनी बेयरस्टो ४८ बलमा ९ चौका र ४ छक्का सहित ८६ रनमा अविजित रहे । बेयरस्टोनै खेलको ‘प्लेयर अफ द म्याच’ चुनिए ।

ओपनर जेसन रोय शून्यमा आउट हुँदा विकेटकिपर जस बटलर ७ रनमा पेभिलिएन फकेका थिए । दुवै ओपनर सस्तैमा आउट हुँदा डेविड मलान १९ रनमा आउट भएपछि इंग्ल्यान्ड केहि दबाबमा परेको थियो । तर बेयरस्टोले उत्कृष्ट प्रर्दशन गर्दै जित पक्का गरे । बेन स्टोक्सले २७ बलमा ३ छक्का र १ चौका सहित ३७, कप्तान ओईन मोर्गन १२ र साम करनले ७ रनको योगदान दिए ।

दक्षिण अफ्रिका डेब्यू खेल खेलेका स्पिनर जर्ज लिन्डेले ४ ओभरमा २० रन खर्चेर २ विकेट लिए । लुन्गी एनगिडीले ३.२ ओभरमा ३१ रन खर्चेर २ र तबरेज शाम्सीले १ विकेट लिए । कागिसो रबाडाले ४ ओभरमा ३२ रन खर्चिदा विकेट लिन सकेनन् ।

त्यसअघि घरेलु मैदान केप टाउनमा टस हारेर ब्याटिङ थालेको दक्षिण अफ्रिकाले निर्धारित २० ओभरमा ६ विकेट गुमाउँदै १ सय ७९ रन बनाएको थियो । दक्षिण अफ्रिका फाफ डु प्लेसिसले ४० बलमा ४ चौका र २ छक्का सहित सर्वाधिक ५८ रनको योगदान दिए ।

ओपनर तथा कप्तान क्विन्टन डी ककले २३ बलमा २ चौका र १ छक्का सहित ३०, टेम्बा बभुमा ५, रासी भान डर डुसेन ३७, हेनरिक क्लासेन २०, लेन्डेले १२ रन जोडेका थिए ।

इंग्ल्यान्डका युवा अलराउन्डर साम करनले ४ ओभरमा २८ रन खर्चेर ३ विकेट लिए । जोफ्रा आर्चर, टम करन र क्रिस जोर्डनले १–१ विकेट हात पारे । दोस्रो टि२० खेल बोलान्ड पार्कमा आइतबार हुने छ ।