एजेन्सी – पाकिस्तान सुपर लिग (पिएसएल) २०२० को फाइनलमा लाहोर कलन्दर्सले कराँची किंग्सलाई १ सय ३५ रनको मध्यम लक्ष्य दिएको छ ।

नेशनल स्टेडियम कराँचीमा टस जितेर ब्याटिङ रोजेको कलन्दर्सले निर्धारित २० ओभरमा ७ विकेट गुमाउँदै १ सय ३४ रन बनायो । कलन्दर्सले सुरुवात राम्रो गरेपनि मध्यक्रम र तल्लोक्रमका ब्याट्सम्यानले कमजोर प्रर्दशन गर्दा विशाल योगफल बनाउनबाट चुकेको हो ।

पहिलो विकेटका लागि कलन्दर्सका ओपनर फखर जमान र तमिम इकबाल १०.१ ओभरमा ६८ रनको साझेदारी गरेका थिए । ११ औं ओभरको पहिलो बलमा उम्मेद आसिफले इफ्तिखर अहमदबाट इकबाललाई ३५ रनमा क्याच आउट गराए ।

इकबालले ३८ बलमा ४ चौका र १ छक्का प्रहार गरे । चौथो बलमा जमान इफ्तिखरबाटै २७ रनमा क्याच आउट हुँदा कलन्दर्स समस्यामा परेको थियो । जमानले २४ बलमा ४ चौका प्रहार गरे । अन्य ब्याट्सम्यानको प्रर्दशन खराब हुँदा सस्तैमा समेटिन पुग्यो ।

इमाद वासिमले १२ औं पहिलो बलमा मोहम्मद हफिजलाई बाबर आजमबाट २ रनमा क्याच आउट गराए । १४ औं ओभरको तेस्रो बलमा स्मित पटेल ५ रनमा क्याच आउट हुँदा कलन्दर्स ८१–४ को अवस्थामा पुगेको थियो । अर्शद इकबालले बेन डंकलाई १६ औं ओभरको चौथो बलमा बाबरबाट ११ रनमा क्याच आउट गराए ।

१९ औं ओभरको पहिलो बलमा सोहिल अख्तर १४ रनमा शेर्फान रदरफोर्डबाट समातिन पुगे । डेभिड विसे १४ बलमा १ छक्का सहित १४ रनमा अविजित रहे । शाहिद अफ्रिदी ४ बलमा १ चौका र १ छक्का सहित १२ रनमा अविजित रहे ।

कराँची किंग्सका उम्मेद आसिफले ४ ओभरमा १८ रन खर्चेर २ विकेट लिए । अर्शद इकबालले ४ ओभरमा २६ रन खर्चेर २ विकेट लिए । वकास मकसुदले ४ ओभरमा १८ रन खर्चेर २ विकेट लिए । इमाद वासिमको नाममा एक विकेट रह्यो ।