काठमाडौं (हाम्रो खेलकुद)– जीतबहादुर खड्का स्मृति पाँचपोखरी सुपर एट क्रिकेट
प्रतियोगिता कोरोना महामारीको कारण यो वर्ष नहुने भएको छ ।

पारा ओलम्पियन खेलाडी स्वर्गिय जीतबहादुर खड्का को २०७२ को विनाशकारी भुकम्पमा परि मृत्यु भएको थियो । देशको नाम उच्च पारेका उनको नाम गुमनाम हुन नदिन यस अघिका तीन वर्षमा लगातार सफलता पूर्वक सम्पन्न गरेका आयोजक पाँचपोखरी क्रिकेट क्लब र पाँचपोखरी थाङपाल गाउँपालिकाले कोरोनाको कारण यो वर्ष नगर्ने निर्णय गरेका हुन् ।

पाँचपोखरी क्रिकेट क्लबका संस्थापक अध्यक्ष विजय कुमार धितालले विश्वमै महामारीको रुप लिएको कोरोना भाइरस र सरकारले गतिविधि सुचारु गर्न नदिदा यो वर्ष स्थगित गर्ने निर्णय लिएको बताए । धितालले सरकारले खेलकुदका गतिविधि सुचारु गर्न स्वीकृति दिएको खण्ड र परिस्थिति सहज भएमा यहि वर्ष आयोजना गर्न सकिने पनि बताएका छन् ।

सिन्धुपाल्चोक जिल्लाका विभिन्न १२ टिमको सहभागीतामा रहने यस प्रतियोगितामा जिल्लामा प्रतिभा खेलाडी पहिचानमा ठूलो योगदान पुर्याउँदै आएको छ । सिन्धुपाल्चोकको पाँचपोखरी थाङपाल गाउँपालिका र पाँचपोखरी क्रिकेट क्लबको संयुक्त आयोजनामा हुदै आएको पाँचपोखरी सुपर–८ क्रिकेट प्रतियोगिता गत वर्ष उपाधि श्रृखंला छिम्ती क्रिकेट क्लबले जितेको थियो ।