एजेन्सी – पाकिस्तान क्रिकेट बोर्ड (पिसिबी ले युवा ब्याट्समयान बाबर आजमलाई टेष्ट क्रिकेट टोलीको कप्तानमा नियुक्त गरेको छ । टि ट्वान्टी र एक दिवसिय टोलीको कप्तान रहि सकेका बाबरलाई पिसिबीले टेष्टको पनि कप्तानी दिने निर्णय गरेको हो ।

नियमित कप्तान अजहर अलीलाई हटाउँदै पाकिस्तानले २६ वर्षिय बाबरलाई तीनै शैलीको कप्तान बनाउने निर्णय लिएको हो । पाकिस्तानले डिसेम्बर २६–३० तथा जनवरी ३–७ मा न्युजिल्यान्डसँग आइसिसी वल्र्ड टेष्ट च्याम्पियनसिप खेल्दैछ । उक्त टेष्ट सिरिजमा बाबरले टेष्टमा पहिलो कप्तानी गर्ने छन् । टेष्ट सिरिजपछि तीन टि ट्वान्टी आई खेलको पनि सम्भावना रहेको बताइएको छ ।

अलीले गतवर्ष पाकिस्तानको टेष्ट टोलीको कप्तानी पाएका थिए । उनले ९ टेष्ट खेलमा कप्तानी गर्दा २ खेलमा जित दिलाएका छन् । पछिल्लो पटक अजहरको कप्तानीमा पाकिस्तानले इंग्ल्यान्डसँग गत अगष्टमा तीन टेष्ट खेलेको थियो । जसमा १–० ले गुमाएको थियो ।

पाकिस्तानले बाबरको कप्तानीमा खेलेको ११ टि ट्वान्टी मध्ये ६ खेल जितेको थियो । २ खेल नतिजा विहिन हुँदा तीन खेलमा हारेको छ । पाकिस्तानले मंगलबार जिम्बावेलाई तीन टि ट्वान्टी सिरिजमा घरेलु मैदानमा क्लिनस्विप गरेको छ । ३ ओडिआईमा बाबरले कप्तानी गर्दा २ मा जिताएका थिए ।

अजहरले बाबरलाई कप्तान समर्थन रहने र सहयोग गर्ने बताएका छन् । बाबर टेष्ट टोलीको कप्तान बनेपछि ट्वीट गर्दै अजहरले भनेका छन्, ‘टेष्ट कप्तानमा नियुक्त भएकोमा बाबर बधाई छ । तिमी मेरो भाई हौं । तिमीलाई पूर्णरुपमा सहयोग गर्ने छु । अल्लाहले थुप्रै उपलब्धी र जितमा पाकिस्तानलाई सहयोग गरुन् ।’

बाबर बर्तमान समयमा विश्व क्रिकेटका उत्कृष्ट ब्याट्सम्यान मध्येका एक हुन् । पाकिस्तानका वर्तमान समयका सर्वोत्कृष्ट ब्याट्सम्यान बाबर आजमले अन्तर्राष्ट्रिय क्रिकेटमा निरन्तर उच्च प्रर्दशन गर्दै आएका छन् । विश्व क्रिकेटमा केहि क्रिकेट विज्ञहरु बाबर भारतीय क्रिकेट टोलीका कप्तान विराट कोहली भन्दा उत्कृष्ट ब्याट्सम्यान रहेको तर्क राख्दै आएका छन् ।