एजेन्सी – दिल्ली क्यापिटल्सका तीव्र गतिका बलर कागिसो रबाडा इन्डियन प्रिमियर लिग (आइपिएल) २०२० का नयाँ इतिहास नजिक छन् ।

फाइनल खेलमा मंगलबार राती दक्षिण अफ्रिकी रबाडाले चार विकेट लिन सकेको खण्डमा दुर्लभ कीर्तिमान आइपिएलमा रच्ने छन् । डेथ ओभर स्पेलिष्ट रबाडाले जारी सिजनमा १६ खेलमा २९ विकेट लिएका छन् । रबाडाले आजको खेलमा चार विकेट लिन सकेको खण्डमा कुल ३३ विकेट लिने छन् । जुन आइपिएल इतिहासमा एकै सिजनमा एक खेलाडीले लिएको सर्वाधिक विकेट संख्या हुनेछ ।

आइपिएलमा एकै संस्करणमा सर्वाधिक विकेट लिने कीर्तिमान चेन्नई सुपर किंग्सका अलराउन्डर ड्वेन ब्राभोको नाममा छ । वेस्टइन्डिजका ब्राभोले सन् २०१३ को आइपिएलमा १८ खेलमा कुल ३२ विकेट लिएका थिए ।

रबाडापछि एकै सिजनमा सर्वाधिक विकेट लिने तेस्रो खेलाडी श्रीलंका तथा मुम्बई इन्डियका तीव्र गतिका बलर लासिथ मलिङ्गाको नाममा छ । मलिङ्गाले सन् २०११ को आइपिएलमा मुम्बईबाट १६ खेलमा २८ विकेट लिएका थिए । अष्ट्रेलिया जेम्स फाल्कनरले सन् २०१३ को आइपिएलमा राजस्थान रोयल्सबाट १६ खेलमा २८ विकेट लिएका थिए ।

जस्प्रित बुमराहले जारी आइपिएलमा २७ विकेट लिइसकेका छन् । बुमराह र रबाडाबीचको प्रर्दशनले आज पर्पल क्यापको निर्धारण गर्ने छ । हालसम्म रबाडाले २ विकेट लिदै पर्पल क्पाप आफ्ना नाममा बनाउन बलियो अग्रता लिएका छन् । फाइनलमा उच्च प्रर्दशन गर्दा पर्पल क्याप जित्नुको साथै कीर्तिमान पनि रोज्ने अवसर रबाडा सामु रहेको छ ।