एजेन्सी – पाकिस्तानले जिम्बावेसँगको तीन टि२० आई खेलको सिरिज एक खेल अगावै २–० ले जितेको छ । आइतबार साँझ पाकिस्तानले दोस्रो टि२० खेलमा जिम्बावेलाई ८ विकेटले हराउँदै सिरिज जितेको हो ।

जितका लागि १ सय ३५ रनको विजयी लक्ष्य पछ्याएको पाकिस्तानले १५.१ ओभरमा २ विकेटको क्षतिमा पूरा गर्यो । पाकिस्तानको जितमा युवा ब्याट्सम्यान हैदर अली ४३ बलमा ६ चौका र ३ छक्का सहित ६६ रनमा अविजित रहे । कप्तान बाबर आजम २८ बलमा ८ चौका र १ छक्का सहित ५१ रनमा क्याच आउट भए ।

ओपनर फखर जमान ११ बल खेल्दै ५ रनमा क्याच आउट भए । दोस्रो विकेटका लागि बाबर र हैदरले एक सय रनको शतकीय साझेदारी गर्दै जित सहज बनाए । खुसदील शाह ११ रनमा अविजित रहे । जिम्बावेका तीव्र गतिका बलर मुजाराबानीले ४ ओभरमा ३३ रन खर्चेर २ विकेट लिए । अन्यले विकेट लिन सकेनन् ।

त्यसअघि रावलपिन्डी क्रिकेट स्टेडियममा टस हारेर ब्याटिङ थालेको जिम्बावेले निर्धारित २० ओभरमा ७ विकेटको क्षतिमा १ सय ३४ रन बनाएको थियो । जिम्बावेका रयान बुर्ल २२ बलमा १ चौका र १ छक्का सहित ३२ रनमा अविजित रहे । ओपनर ब्रेन्डन टेलर ३, चमु चिभभा १५, सेन विलियम्स १३ र वेस्ली मधेभरेले २४ रनको योगदान दिए । सिकन्दर राजा ७, एल्टन चिगुम्बुरा १८ र डोनाल्ड तिरिपानोले १५ रनको योगदान दिए ।

पकिस्तानका तीव्र गतिका बलर हरिस रौफले ४ ओभरमा ३१ रन खर्चेर ३ विकेट लिए । लेगस्पिनर उस्मान कादिरले ४ ओभरमा २३ रन खर्चेर ३ विकेट लिए । फहिम अशराफले एक विकेट लिए । पहिलो खेलमा पाकिस्तान ६ विकेटले विजयी भएको थियो । तेस्रो तथा अन्तिम मंगलबार हुने छ ।