एजेन्सी – कप्तान बाबर आजमको उत्कृष्ट प्रर्दशनको सहयोगमा पाकिस्तानले जिम्बावेसँगको पहिलो टि२० खेलमा सहज जित निकालेको छ । शनिबार साँझ सम्पन्न खेलमा पाकिस्तानले जिम्बावेलाई ६ विकेटले पराजित गर्दै तीन टि२० आई खेलको सिरिजमा १–० को अग्रता लिएको छ ।

जितको लागि १ सय ५७ रनको विजयी लक्ष्य पछ्याएको पाकिस्तानले १८.५ ओभरमा ४ विकेटको क्षतिमा पूरा गर्यो । पाकिस्तानको जितमा कप्तान तथा ओपनर बाबर आजम ५५ बलमा ९ चौका र १ छक्का सहित ८२ रनमा क्याच आउट भए । अनुभवी ब्याट्सम्यान मोहम्मद हफिजले ३२ बलमा ३ चौका र १ छक्का सहित ३६ रनको योगदान दिए ।

खुशदील शाह ५ रनमा अविजित रहे । ओपनर फखर जमान १२ बलमा २ चौका र १ छक्का सहित १९ र हैदर अली ७ रनमा क्याच आउट भए । जिम्बावेका मुजाराबानीले ३.५ ओभरमा २६ रन खर्चेर २ विकेट लिए । रिचर्ड नगारावा र टेन्डाई चटराले एक एक विकेट लिए ।

त्यसअघि रावलपिन्डी क्रिकेट स्टेडियममा टस जितेर ब्याटिङ रोजेको जिम्बावेले निर्धारित २० ओभरमा ६ विकेट गुमाउँदै १ सय ५६ रन बनाएको थियो । जिम्बावेका युवा ब्याट्सम्यान वेस्ली मधेभरे ४८ बलमा ९ चौका र १ छक्का सहित ७० रनमा अविजित रहेपनि टोलीको हार टार्न सकेनन् ।

ओपनर ब्रेन्डन टेलर २०, सेन विलियम्स २५, एल्टन चिगुम्बुराले २१ रनको योगदान दिए । पाकिस्तानका हरिस रौफ र वहाब रियाजले २–२ विकेट लिए । उस्मान कादिर र मोहम्मद हसनैनले एक एक विकेट लिए । दोस्रो टि२० खेल आइतबार हुने छ ।