काठमाडौं (हाम्रो खेलकुद) – राष्ट्रिय क्रिकेट टोलीका कप्तान पारस खड्का र अर्का सिनियर खेलाडी बसन्त रेग्मीको टोलीबीच वाइवाइ इपिएल ट्वान्टी–२० क्रिकेट प्रतियोगिताको उद्घाटन खेल हुने भएको छ । कीर्तिपुरस्थित त्रिभुवन विश्व विद्यालयको मैदानमा असोज ८ मा हुने उद्घाटनमा कान्तिपुर गोर्खाज र विशाल वारियर्सबीच प्रतिस्पर्धा हुने आयोजक जोहरा स्पोर्टस मेनेजमेन्टले जनाएको छ । पारस विशाल वारियर्स र बसन्त कान्तिपुर गोर्खाजका कप्तान हुन् ।

प्रतियोगितामा सहभागी अन्य टोलीलाई राष्ट्रिय टोलीका उपकप्तान ज्ञानेन्द्र मल्लले कलर्स एक्स,शरद भेषावकरले पन्चकन्या तेज, शक्ति गौचनले जगदम्बा राइनोज र विनोद भण्डारीले सगरमाथा लिजेन्ड्को नेतृत्व गर्नेछन् । असोज ९ मा पन्चकन्या र कलस्ृ एक्स तथा सगरमाथा र कान्तिपुरबीच प्रतिस्पर्धा हुनेछ । त्यस्तै असोज १० गते पन्चकन्या र जगदम्बा तथा विशाल र सगरमाथा एकअर्काविरुद्ध उत्रनेछन् ।

इपिएल राउन्ड रोविन लिगका आधारमा सञ्चालन हुनेछ । हरेक टोलीले एकअर्कासँग प्रतिस्पर्धा गर्द एउटा टोलीले कम्तीमा ५ खेल खेल्नेछन् । इपिएलमा जम्मा १६ खेल हुनेछन् । राउन्ड रोविन पछि अंकतालिकाका शीर्ष दुई टोलीले फाइनल खेल्नेछन् । आयोजकले इपिएलका सहभागी खेलाडीलाई चार श्रेणीमा विभाजन गरि म्याच फिको रकम तोकेको छ । हरेक टोलीको कप्तानले प्रति खेल २० हजार रुपैयाँ म्याच फि पाउनेछन् । राष्ट्रिय टोलीबाट कम्तिमा १५ वटा अन्तर्राष्ट्रिय खेलमा प्रतिस्पर्धा गरेका खेलाडीले एक खेल बराबर १५ हजार रुपैया प्राप्त गर्नेछन् भने यू १९ विश्वकप टोलीका सदस्यले १२ हजार रुपैयाँ पाउनेछन् । बाँकी खेलाडीले भने हरेक खेल वापत ८ हजार रुपैयाँ प्राप्त गर्नेछन् ।