एजेन्सी – बायाँ हाते युवा ओपनर देवदत्त पाडिक्कलले आफ्नो उत्कृष्ट लयलाई निरन्तरता दिँदै अर्धशतक प्रहार गरेपछि रोयल च्यालेन्जर्स बेंगलोरले इन्डियन प्रिमियर लिग (आइपिएल) को ४८ औं खेलमा मुम्बई इन्डियन्सलाई १ सय ६५ रनको मध्यम लक्ष्य दिएको छ ।

शेख जायद स्टेडियम आबूधाबीमा टस हारेर ब्याटिङ थालेको बेंगलोरले २० ओभरमा ६ विकेटको क्षतिमा १ सय ६४ रन बनायो । पाडिक्कलले ४५ बलमा १२ चौका र १ छक्का सहित सर्वाधिक ७४ रनको योगदान दिए । सुरुवात राम्रो गरेपनि अन्त्य कमजोर गर्दा बेंगलोर विशाल योगफल बनाउन चुकेको हो । बेंगलोरले अन्तिम पाँच ओभरमा ३५ रन जोड्न ४ विकेट गुमाउन पुगेको थियो ।

बेंगलोरलाई दुई युवा ओपनर ओपनर देवदत्त पाडिक्कल र जोश फिलिपेले ७.५ ओभरमा ७१ रनको साझेदारी गर्दै उत्कृष्ट सुरुवात दिलाएका थिए । यी दुई ओपनरबीचको साझेदारी स्पिनर राहुल चहरले क्विन्टन डी ककबाट फिलिपेलाई स्टम्पिङ आउट गराउँदै तोडेका थिए । फिलिपेले २४ बलमा ४ चौका र १ छक्का सहित ३४ रनको योगदान दिए । फिलिपेको खुट्टा जमिनको सतह भन्दा केहिमाथी भएको अवस्थामा स्टम्पिङ हुन पुगेका थिए ।

जस्प्रित बुमराहले कप्तान विराट कोहलीलाई १२ औं ओभरको दोस्रो बलमा सौरभ तिवारीबाट ९ रनमा क्याच आउट गराए । कप्तान काइरन पोलार्डको १६ औं ओभरको दोस्रो बलमा एबी डि भिलियर्स चहरबाट १५ रनमा क्याच आउट हुन पुगे । डी भिलियर्सले १२ बलमा १ चौका र १ छक्का प्रहार गरे ।

१७ औं ओभरमा बुमराहले दुई विकेट सहित मेडन राख्दै खेलमा फर्काएका थिए । तेस्रो बलमा ठूलो सट खेल्ने धुनमा शिवम् दुबे दुई रनमा सूर्यकुमार यादवबाट क्याच आउट हुन पुगे । पाँचौ बलमा पाडिक्कल बोल्टबाट समातिन पुगे । ट्रेन्ट  बोल्टको १८ औैं ओभरको दोस्रो बलमा क्रिस मोरिस ४ रनमा जेम्स प्याटिनसनबाट क्याच आउट हुन पुगेका थिए । गुरक्रित मानसिंह ११ बलमा २ चौका सहित १४ रनमा अविजित रहे ।

वासिन्टन सुन्दर ६ बलमा १ चौका सहित १० रनमा अविजित रहे । जस्प्रित बुमराहले ४ ओभरमा १ मेडन सहित १४ रन खर्चेर ३ विकेट लिए । राहुल चहर, ट्रेन्ट बोल्ट र कप्तान काइरन पोलार्डको नाममा एक एक विकेट रह्यो ।