एजेन्सी – इन्डियन प्रिमियर लिग (आइपिएल) को ४८ औं खेलमा मुम्बई इन्डियन्सले रोयल च्यालेन्जर्स बेंगलोरविरुद्ध पहिला बलिङ गर्ने भएको छ ।

शेख जायद स्टेडियम आबूधाबीमा मुम्बईका कार्यबाहक कप्तान काइरन पोलार्डले टस जितेर पहिला बलिङ गर्ने निर्णय लिएका हुन् । मुम्बईले टोलीमा परिवर्तन गरेको छैन । बेंगलोरले टोलीमा तीन परिवर्तन गरेको छ । कप्तान विराट कोहलीका अनुसार ओपनर आरोन फिन्चको स्थानमा युवा ब्याट्सम्यान जोश फिलिपेलाई मौका दिएको छ ।

त्यस्तै अलराउन्डर मोईन अलीको स्थानमा तीव्र गतिका बलर डेल स्टेनलाई मौका दिएको छ । घाइते नवदीप सैनी आज टोलीमा छैनन् । सैनी नहुँदा शिवम् दुबेले मौका पाएका छन् । सैनी पछिल्लो खेलमा घाइते हुन पुगेका थिए ।

मुम्बई र बेंगलोरबीचको विजेता टोलीको प्लेअफमा स्थान पक्का हुने छ । पराजित हुने टोलीले प्ले अफमा स्थान बनाउन अन्य नतिजा पर्खनु पर्ने हुन्छ । आजको विजेता टोली शीर्षस्थानमा उक्लिने छ । समान ११ खेल खेलेका मुम्बई र बेंगलोरको १४–१४ अंक छ । नेट रन रेटको आधारमा मुम्बई शीर्ष र बेंगलोर दोस्रो स्थानमा छ ।

आजको विजेता टोलीलाई शीर्ष दुई मा रहेर लिग चरण अन्त्य गर्दै सोझै क्वालिफायर खेल्न पाउने अवसर पनि रहनेछ । लिग चरणको खेलमा मुम्बई बेंगलोरसँग सुपर ओभरमा पराजित भएको थियो । आइपिएलमा यी दुई टोलीबीच कुल २६ खेल भएको छ । जसमा मुम्बई १६ खेलमा विजयी हुँदा १० खेलमा पराजित भएको छ ।

मुम्बईको प्लेइङ ११ – काइरन पोलार्ड(कप्तान) क्विन्टन डी कक (विकेटकिपर), सूर्यकुमार यादव, ईशान किशन, क्रुनाल पान्ड्या, हार्दिक पान्ड्या, सौरभ तिवारी , जेम्स प्याटिनसन, राहुल चहर, ट्रेन्ट बोल्ट र जस्प्रित बुमराह

बेंगलोरको प्लेइङ ११ – जोश फिलिपे, देवदत्त पाडिक्कल, विराट कोहली (कप्तान) एवी डि भिलियर्स, क्रिस मोरिस, मोहम्मद शिराज, वासिन्टन सुन्दर, गुरकिरत सिंहमान, शिवम् दुबे, डेल स्टेन र युजभेन्द्र चहल