एजेन्सी – वेस्टइन्डिजका चर्चित अलराउन्डर आन्द्रे रसेल सहित पाँच खेलाडीले श्रीलंका क्रिकेट बोर्डले आयोजना गर्ने लंका प्रिमियर लिग (एलपिएल) नखेल्ने भएका छन् ।

एलपिएल नोभेम्बर २१ देखि डिसेम्बर १३ सम्म पाँच फ्रेन्चाइज टोलीबीच प्रतिस्पर्धा हुँदै छ । गत सोमबार मात्र ड्राफ्ट मार्फत सबै फ्रेन्चाइज टोलीले खेलाडी अनुबन्ध गरेका थिए । आन्द्रे रसेलसँगै दक्षिण अफ्रिका ब्याट्सम्यान फाफ डु प्लेसिस, डेविड मिलर र इंग्ल्यान्डका डेविड मलानले एलपिएल नखेल्ने भएका हुन् ।

त्यस्तै भारतीय विकेटकिपर मनविंदर बिसलाले पनि नखेल्ने जनाएका छन् । मलान, डु प्लेसिस र मिलरले इंग्ल्यान्ड र दक्षिण अफ्रिकाबीच हुने समान तीन ओडिआई र टि२० आई सिरिजको कारण नखेल्ने भएका हुन् । इंग्ल्यान्ड र दक्षिण अफ्रिकाबीच नोभेम्बर २७ देखि डिसेम्बर ९ सम्म तीन ओडिआई र तीन टि२० सिरिज हुने छ ।

कोलकाताबाट इन्डियन प्रिमियर लिग (आइपिएल) खेलि रहेका अलराउन्डर आन्द्रे रसेल र बिसलाले चोटका कारण नखेल्ने भएका हुन् । रसेल गत अक्टोबर १८ मा सनराइजर्स हैदराबादविरुद्ध खेल्ने क्रममा घाईते हुन पुगेका थिए । एलपिएलमा पाँच टोलीबीच १५ दिनसम्म प्रतिस्पर्धा चल्ने छ ।

कोलोम्बो किंग्स, डम्बुल्ला हक्स, गाल्ले ग्ल्याडियटर्स, क्यान्डी टस्कर्स र जाफना स्टेलियन्स गरि पाँच फ्रेन्चाइज टोलीले एलपिएलमा प्रतिस्पर्धा गर्नेछन् । कोलोम्बो किंग्स आन्द्रे रसेल, फाफ डु प्लेसिस, डम्बुल्ला हक्समा मिलर र जाफनामा मलान रहेका थिए । एलपिएल सुरुहुुन अव चार साता बाँकी छ । तर चुनौतीभने धेरै रहेका छन् । श्रीलंकामा १४ दिन अनिवार्य क्वारेन्टाइनमा बस्नुपर्ने हुन्छ ।