एजेन्सी– इन्डियन प्रिमियर लिग (आइपिएल) को ४७ औं खेलमा दिल्ली क्यापिटल्सले सनराइजर्स हैदराबादविरुद्ध पहिला बलिङ गर्ने भएको छ ।

दुबई इन्टरनेशल क्रिकेट स्टेडियममा दिल्लीका कप्तान श्रेयस ऐरले टस जितेर पहिला बलिङ गर्ने निर्णय लिएका हुन् । दिल्लीले आजको खेलमा टोलीमा परिवर्तन गरेको छैन । हैदराबादले भने तीन परिवर्तन गरेको छ । ओपनर जोनी बेयरस्टोको स्थानमा केन विलियम्सन, प्रियम गर्गको स्थानमा ऋद्धिमान शाह र खलिल अहमदको स्थानमा शहबाज नदीमलाई मौका दिएको छ ।

दिल्ली आजको खेलमा विजयी भए १६ अंकका साथ शीर्षस्थानमा उक्लिनुको साथै प्लेअफमा पुग्नेछ । हैदराबादलाई प्ले अफको झिनो आशालाई कायमै राख्न आजको खेलमा जित निकाल्नै पर्ने हुन्छ । आजको खेलमा पराजित भए हैदराबाद आधिकारीक रुपमा प्लेअफ दौडबाट बाहिरिने छ । दिल्ली ११ खेलमा ७ मा जित र ४ मा हार सहित १४ अंकका साथ दोस्रो स्थानमा छ । हैदराबाद ११ खेलमा ७ मा हार र ४ मा जित सहित सातौं स्थानमा छ । दिल्ली हैदराबादसँग सजग छ ।

दिल्लीको प्लेइङ ११ – अजिका रहाणे, शिखर धवन, ऋषभ पन्त (विकेटकिपर), श्रेयस ऐर (कप्तान), शिम्रन हेटमायर, मार्कस स्टोइनिस, रविचन्द्रन आश्विन, अक्षर पटेल, कागिसो रबाडा, एनरिच नोर्किया र तुषार देशपान्डे ।

हैदराबादको प्लेइङ ११ – डेविड वार्नर (कप्तान), केन विलियम्सन, मनिष पान्डे, विजय शंकर, ऋद्धिमान शाह (विकेटकिपर) , अब्दुल सामद , जेसन होल्डर, राशिद खान, सन्दीप शर्मा , टि नटराजन र शहबाज नदीम ।