एजेन्सी– इन्डियन प्रिमियर लिग (आइपिएल) को सर्वाधिक सफल फ्रेन्चाइज टोली चेन्नई सुपर किंग्स इतिहासमा पहिलो पटक लिग चरणबाटै बाहिरिएको छ ।

आइतबार राती राजस्थान रोयल्सले शीर्षस्थानको मुम्बई इन्डियन्समाथि ८ विकेटको जित निकालेसँगै चेन्नई औपचारिक रुपमा बाहिरिएको हो । आइपिएलको इतिहासमा पहिलो पटक चेन्नई लिग चरणबाट बाहिरिन पुगेको हो । यस अघिका संस्करणमा लगातार फाइनलमा सहजै स्थान बनाउदै आएको चेन्नई यो पटक खराब प्रर्दशनका साथ बाहिरिएको छ । यस अघिका सबै संस्करणमा चेन्नईले सहजै प्ले अफमा स्थान बनाउँदै आएको थियो ।

महेन्द्रसिंह धोनी कप्तान रहेको चेन्नईले तीन पटक उपाधि जितेको थियो । सन् २०१०, २०११ र २०१८ मा उपाधि जितेको थियो । पाँच पटक फाइनलमा पराजित भएको थियो । यस अघि चेन्नईले खेलेका १० संस्करण मध्य दुई सिजनमा मात्र फाइनलमा पुग्न सकेको थिएन ।

अन्य सबै संस्करणमा फाइनल सम्म पुगेको थियो । सुरुवात देखिनै धोनीले उत्कृष्ट कप्तानीका साथ सफलता दिलाउँदै आएका थिए । तर यस पटक इतिहासकै खराब प्रर्दशन गर्न पुग्यो । चेन्नई लिग चरणका दुई खेल बाँकी हुँदा १२ खेलमा ८ खेलमा हार र ४ मा जित सहित ८ अंकका साथ पुछारमा छ । चेन्नईले अब दुई खेल खेल्न बाँकी छ । चेन्नईले बिहिबार कोलकाता नाइट राइडर्स र आइतबार किंग्स इलेभेन पन्जाबसँग प्रतिस्पर्धा गर्ने छ ।

यसअघिका संस्करणमा चेन्नईको प्रर्दशन

चेन्नई पहिलो संस्करणमै फाइनलमा पुगेको थियो । चेन्नई फाइनलमा राजस्थानसँग तीन विकेटले पराजित भएको थियो । सन् २००९ मा चेन्नई सेमिफाइनलबाट बाहिरिएको थियो । सन् २०१० र २०११ मा चेन्नईले लगातार उपाधि जित्यो । सन् २०१० मा मुम्बई इन्डियन्सलाई २२ रनले पराजित गर्दै चेन्नईले उपाधि जितेको थियो । सन् २०११ मा चेन्नईले रोयल च्यालेन्जर्स बेंगलोरलाई ५८ रनले पराजित गर्दै उपाधि जितेको थियो । सन् २०१२ को फाइनलमा चेन्नई कोलकाता नाइट राइडर्ससँग पराजित भएको थियो ।

सन् २०१३ मा मुम्बइले चेन्नईलाई २३ रनले हराउँदै उपाधि जितेको थियो । सन् २०१४ मा चेन्नई तेस्रो स्थानमा रहेर बाहिरिएको थियो । सन् २०१५ मा चेन्नई फाइनलमा मुम्बईसँग ४१ रनले पराजित भएको थियो । सन् २०१६ र २०१७ मा भने प्रतिबन्धमा परेको थियो । सन् २०१८ मा चेन्नईले फाइनलमा सनराइजर्स हैदराबादलाई ८ विकेटले पराजित गर्दै तेस्रो पटक उपाधि जितेको थियो । गतवर्ष मुम्बईसँग फाइनलमा एक रनले पराजित भएको थियो ।