एजेन्सी – अलराउन्डर हार्दिक पान्ड्याको आक्रामक ब्याटिङमा इन्डियन प्रिमियर लिग (आइपिएल) को ४५ औं खेलमा मुम्बई इन्डियन्सले राजस्थान रोयल्सलाई १ सय ९६ रनको बलियो लक्ष्य दिएको छ ।

शेख जायद स्टेडियम आबूधाबीमा टस जितेर पहिला ब्याटिङ थालेको मुम्बईले २० ओभरमा ५ विकटको क्षतिमा १ सय ९५ रन बनायो । मुम्बईलाई बलियो योगफलमा पुर्याउन तल्लोक्रममा आक्रामक ब्याटिङ गर्दै हार्दिक पान्ड्या २१ बलमा २ चौका र ७ छक्का सहित ६० रनमा अविजित रहे । हार्दिकले अन्तिम ओभरमा कार्तिक त्यागीलाई तीन छक्का र दुई चौका गरि कुल २७ रन जोडेका थिए ।

तीव्र गतिका बलर जोफ्रा आर्चरले पहिलो ओभरको पाँचौ बलमा क्विन्टन डी ककलाई ६ रनमा बोल्ड आउट गरे । दोस्रो विकेटका लागि सूर्यकुमार यादव र ईशान किशनले ८३ रनको महत्वपूर्ण साझेदारी गरेका थिए । ११ औं ओभरको चौथो बलमा कार्तिक त्यागीले जोफ्रा आर्चरबाट ईशान किशनलाई ३७ रनमा क्याच आउट गराए । किशनले ३६ बलमा ४ चौका र १ छक्का प्रहार गरे ।

श्रेयस गोपालले १३ औं ओभरको दोस्रो बलमा बेन स्टोक्सबाट सूर्यकुमार यादवलाई ४० रनमा क्याच आउट गराए । यादवले २६ बलमा ४ चौका र १ छक्का प्रहार गरे । यसै ओभरको अन्तिम बलमा कप्तान काइरन पोलार्ड ६ रनमा बोल्ड आउट भए ।

आर्चरको १९ औं ओभरको पहिलो बलमा सौरभ तिवारी ३४ रनमा स्टोक्सबाट क्याच आउट भए । तिवारीले २५ बलमा ४ चौका र १ छक्का प्रहार गरे । पाँचौ विकेटका लागि तिवारी र पान्ड्याले ६४ रनको साझेदारी गरेका थिए । जोफ्रा आर्चरले ४ ओभरमा ३१ रन खर्चेर २ विकेट लिए । श्रेयस गोपालले ४ ओभरमा ३० रन खर्चेर २ विकेट लिए । कार्तिक त्यागिले एक विकेट लिए ।