एजेन्सी– इन्डियन प्रिमियर लिग (आइपिएल) को ४५ औं खेलमा आज मुम्बई इन्डियन्स र राजस्थान रोयल्सबीच प्रतिस्पर्धा हुँदैछ । खेल नेपाली समय अनुसार ७ : ४५ पछि शेख जायद स्टेडियम आबूधाबीमा सुरु हुनेछ ।

मुम्बई १० खेलमा ७ मा जित र ३ मा हार सहित शीर्ष स्थानमा रहेको छ । आजको खेलमा विजयी भए प्ले अफमा स्थान पक्का हुनेछ । यता ११ खेलमा ७ मा हार र ४ मा जित सहित सातौं स्थानमा रहेको राजस्थानलाई झिनो अंक गणीय आशा कायमै राख्न आजको खेल जित्नै पर्ने हुन्छ ।

आजको खेलमा पराजित भएमा राजस्थानको अघिल्लो चरणको यात्रा समाप्त हुने छ । मुम्बईले पछिल्लो खेलमा चेन्नई सुपर किंग्सलाई १० विकेटले हराएको थियो । उक्त खेलमा घाइते हुँदा कप्तान रोहित शर्मा टोलीमा थिएनन् । काइरन पोलार्डले कप्तानी गरेका थिए । रोहित आजको खेलमा पनि उपलब्ध हुने सम्भावना न्यून छ ।

मुम्बईका सबै खेलाडी राम्रो लयमा छन् । जसले मुम्बईको मनोबल उच्च छ । ओपनर क्विन्टन डी कक, तीव्र गतिका बलर जस्प्रित बुमराह र ट्रेन्ट बोल्ट उच्च लयमा छन् । यी तीन खेलाडी देखि राजस्थानका खेलाडी सहज हुन आवश्यक देखिन्छ । कप्तान काइरन पोलार्डको आक्रामक लयलाई रोक्न राजस्थानका बलरलाई सहज हुने छैन ।

राजस्थान पछिल्लो खेलमा सनराइजर्स हैदराबादसँग ८ विकेटले पराजित भएको थियो । कमजोर ब्याटिङ राजस्थानलाई सबैभन्दा ठूलो चिन्ताको विषय हो । आजको खेलमा राजस्थानका ब्याट्सम्यानलाई चमत्कार प्रर्दशन गर्न आवश्यक देखिन्छ । बेन स्टोक्स, सन्जु स्यामसन, जस बटलर र कप्तान स्टिभ स्मिथलाई ठूलो इनिङ खेल्न आवश्यक देखिन्छ । जोफ्रा आर्चरले लगतार राम्रो प्रर्दशन गर्दा अन्य बलरको त्यति राम्रो साथ पाउन सकेका छैनन् ।

राजस्थान र मुम्बईबीच आइपिएलमा कुल २२ खेल भएको छ । जसमा राजस्थान १० खेलमा विजयी हुँदा ११ खेलमा पराजित भएको छ । जारी सिजनको आइपिएलमा लिग चरणको पहिलो खेलमा मुम्बईले राजस्थानलाई ५७ रनले पराजित गरेको थियो ।